د ننګرهار پوهنتون د مالي او اداري چارو مرستیال د یاد معاونیت اړوندو آمرینو سره غونډه وکړه.
د ننګرهار پوهنتون د مالي او اداري چارو مرستیال پوهنیار قاضي خالد صداقت په داسې حال کې، چې د یاد پوهنتون د علمي چارو مرستیال پوهندوی مـولوي احسان الله ناصح هم حضور درلود، د مالي او اداري معاونیت اړوند د یو شمېر څانګو له آمرینو او کارکوونکو سره غونډه وکړه.
په یاده غونډه کې په ټاکلي وخت او معیاري شکل د چارو په ترسره کولو، اداري اصولو رعایت، کارکوونکو ته د روزنیزو ورکشاپونو جوړولو او د پوهنتون په تدارکاتي پلان خبرې او بحثونه وشول.
د پوهنتون مرستیالانو د بېلابېلو آمریتونو د چارو پر وړاندې پرتې ستونزې واورېدلې، د حل پر لارو یې خبرې وشوې او د مالیې وزارت د اصولو او مقرراتو په پام کې نیولو سره د بودیجې لګولو او مالي او حسابي چارو د چټکتیا په برخه کې یې د یو روزنیز ورکشاپ په جوړېدو ټینګار وکړ.
د غونډې په وروستۍ برخه کې د ننګرهار پوهنتون په نهايي تدارکاتي پلان باندې بحث وشو، د پوهنتون د مرستیالانو له لوري تائید او مسؤلینو ته یې په بشپړه توګه د عملي کولو سپارښتنه وشوه.
سرچینه: د عامه اړیکو، اطلاعاتو او نشراتو امریت
