د ننګرهار پوهنتون رئیس د تدریسي روغتون له روانو چارو څخه نظارت ترسره کړ.
د ننګرهار پوهنتون رئیس شیخ انعام الله مدني تېره ورځ ماښام مهال د پوهنتون اړوند تدریسي روغتون ته ورغی او هلته یې د بېلابېلو څانګو له روانو چارو د نږدې لیدنه وکړه.
په یاده نظارتي لیدنه کې د پوهنتون رئیس د روغتون او څانګو په کچه د نوکریوالو ډاکترانو حضور او د روغتون له روانو خدمتونو څخه د ناروغانو د رضایت کچه معلومه کړه، د روغتون د پرسونل او ناروغانو ستونزې یې واورېدلې.
د لیدنې پر مهال نوموړي نوکریوالانو ته سپارښتنه وکړه، چې ټولو داخل بستر او خارج بسترناروغانو ستونزو ته په جدي توګه رسېدنه وکړي، په چارو کې نظم او پاکوالي باندې زیات تمرکز وکړي او د ناروغانو خدمت ته لومړیتوب ورکړي.
