د تابش پوهنتون محصلینو له ننګرهار پوهنتون څخه لیدنه وکړه.
په ننګرهار ولایت کې د تابش پوهنتون لسګونه تنه محصلین په يوه علمي سفر ننګرهار پوهنتون ته راغلل او ددې پوهنتون له رئیس، د علمي چارو، مالي او اداري چارو مرستیالانو سره د لیدنې سربېره یې د ننګرهار پوهنتون له بېلابېلو برخو څخه هم لیدنه وکړه.
راغلو محصلینو د ننګرهار پوهنتون د یو شمېر پوهنځيو، عمومي کتابتون، تحقیقاتي فارمونو، لابراتوارونو او مرکزي لیلیې څخه لیدنه وکړه، چې د محصلانو خدمتونو انسجام آمریت مسؤلینو له خوا ورته معلومات ورکول کېدل.
د ننګرهار پوهنتون رئیس شـــــــيخ انعام الله مدني راغلو محصلینو سره د مجلس پر مهال هغوی ته د ښه راغلاست ویلو تر څنګ د علمي سیر په ګټو خبرې وکړې او زیاته یې کړه، علمي سیرونه د محصلینو په سالمه روزنه، عملي زده کړو او شخصیت جوړونه کې مهم رول لري.
نوموړي د امـــــارتي او خصوصي پوهنتونونو تر منځ په علمي اړیکو او زیاتې همغږۍ ټینګار وکړ او د ننګرهار میشتو خصوصي پوهنتونونو او لوړو زده کړو موسسو د چارو د ارزونې او ښه والي په اړه یې د خپلو پلانونو په اړه راغلو محصلینو ته معلومات ورکړل.
د ننګرهار پوهنتون د علمي چارو مرستیال پوهندوی احسان الله ناصح او د اداري او مالي چارو مرستیال پوهنیار قاضي خالد صداقت د غونډې نور ویناوال وو، چې محصلینو ته یې د ننګرهار پوهنتون په تاریخچې، په ټولنه کې د محصلینو په رسالت، علمي سیرونو پر مهال د زده کړو مسایلو په عملي کولو او د تحصیلي دورې په ټولو فعالیتونو کې د وخت منظم مدیریت په اړه خبرې وکړې او هغوی ته یې د هر راز همکارۍ ډاډ ورکړ.
د تابش پوهنتون د محصلانو چارو مرستیال شمس الحق ثاقب په تېر کې د خپلې تحصیلي موسسې سره د ننګرهار پوهنتون د همکاریو یادونه وکړه او د دغه علمي سیر پر مهال یې د ننګرهار پوهنتون په اړه ترلاسه کړي مثبت تأثرات له هغوی سره شریک کړل.
نوموړي زیاته کړه: د پوهنتون چاپېریال، علمي، تدریسي او رغنیزو چارو او پرمختګونو لیدنې یې پر محصلینو مثبت اغېز وکړ او دوی ته یې ښه احساس او انګېزه ورکړه.
سرچینه: د عامه اړیکو، اطلاعاتو او نشراتو امریت
