د ننګرهار پوهنتون محصلینو څخه په پنځو فرامینو کتاب کې د اخیستل شوې سیالۍ پایلې اعلان او له حفظ حلقې څخه د فارغو محصلینو دستار بندي ترسره شوه.

د ننګرهار پوهنتون څوارلس ګونو پوهنځیو له ګڼو محصلینو څخه د عالیقدر امیرالمؤمنین حفظه الله تعالی و رعاه پنځو فرامینو کتاب کې د اخیستل شوې ازموینې پایلې اعلان او همدارنګه د دعوت او ارشاد امریت تر چتر لاندې د حفظ حلقې ۱۲ تنو فارغو محصلینو ته د فضیلت دستارونه وتړل شول.
په دې اړه د ننګرهار پوهنتون د دعوت او ارشاد او محصلانو خدمتونو او همغږۍ امریت په ګډه غونډه جوړه کړې وه، چې د ننګرهار پوهنتون د عمومي رئیس او محصلانو چارو مرستیال سربېره په کې د لوړو زده کړو وزارت د محصلانو خدمتونو او همغږۍ رئیس، امام ابوحنیفه رحمه الله دیني تخصصاتو جامعې رئیس او استادانو، د مختلفو پوهنځیو استادانو او ګڼو محصلینو په کې برخه لرله.
د ننګرهار پوهنتون عمومي رئیس شیخ انعام الله مدني په خپلو خبرو کې د قرانکریم حفظ له دورې فارغو محصلینو ته مبارکي وویله چې د مسلکي زده کړو سره سره یې دا لوی ویاړ ګټلی او دغه راز یې د اسلامي نظام مشرتابه حفظه الله د پنځو فرامینو کتاب په سیالۍ کې د ممتازو محصلینو هڅې وستایلې او سپارښتنه یې وکړه چې محصلین باید یاد فرامین زده او پرې عمل وکړي.
د لوړو زده کړو وزارت د محصلانو خدمتونو او همغږۍ رئیس مولوي فضل کریم صدیقي، د ننګرهار پوهنتون د ژبو او ادبیاتو پوهنځي رئیس پوهنیار حافظ سید محمد قاسم هاشمي او د امام ابوحنیفه دیني تخصصاتو جامعې استاد مفتي شاهدالله حقاني په خپلو خبرو کې د ننګرهار پوهنتون له رهبرۍ او استادانو مننه وکړه، چې په دوامداره توګه یې د محصلینو عقیدوي، فکري، اصلاحي او مسلکي روزنې ته پاملرنه کړې او  د اسلامي احکامو د زده کړې او عملي کولو په برخه کې یې د محصلینو لپاره د پوهاوي او لارښوونې پروګرامونه برابر کړي دي.
د غونډې په پای کې د پوهنتون مشرتابه او نورو مېلمنو له خوا حافظانو ته د فضیلت دستارونه وتړل شول او پنځو فرامینو کتاب ازموینه کې ممتازو محصلینو ته ډالۍ او جوایز ورکړل شول.
سرچینه: د اطلاعاتو، نشراتو او عامه اړیکو امریت