د لوړو زده کړو وزارت مقام د دفتر رئیس د ننګرهار پوهنتون مشرتابه سره وليدل.
د لوړو زده کړو وزارت مقام د دفتر رئیس عرفان الله عباد د ننګرهار پوهنتون رئیس پوهاند دوکتور خلیل احمد بهسودوال سره ولیدل.
په یاده لیدنه کې، چې د پوهنتون ځینو نورو مسؤلینو او استادانو هم په کې برخه لرله، د ننګرهار پوهنتون د فعالیتونو، لاسته راوړنو، ستونزو او د هغې د حل په لارو چارو بحث او خبرې وشوې.
پوهاند بهسودوال راغلي پلاوي ته د ښه راغلاست ویلو تر څنګ زیاته کړه، چې د ننګرهار پوهنتون ټولې علمي او تدریسي چارې د لوړو زده کړو وزارت د اصولو او مقرراتو سره سمې پر مخ ځي.
نوموړي دغه راز د پوهنتون د تاریخي شالید، تشکیلاتو، فعالیتونو، علمي او رغنیزو لاسته راوړنو او دغه راز په پوهنتون کې د شته ستونزو او ننګونو په اړه راغلي پلاوي ته معلومات ورکړل.
د لوړو زده کړو وزارت مقام د دفتر رئیس ننګرهار پوهنتون د هېواد دويم ستر اکاډمیک مرکز ياد کړ، چې په وینا یې، لسګونه زره علمي کادرونه یې په اسلامي او ملي روحیه سمبال روزلي او ټولنې ته یې د خدمت په موخه وړاندې کړي.
ښاغلي عباد د ننګرهار پوهنتون مشرتابه ته ډاډ ورکړ، چې د پوهنتون د نیمه کاره ودانیو او نورو برخو کې شته ستونزې به د حل په موخه د لوړو زده کړو وزارت مقام سره شریکې او په ډېر جدیت سره تعقیب کړي.
