په ختیځ کې د ملګرو ملتونو د کډوالو ادارې مسؤلینو د ننګرهار پوهنتون له مشرتابه سره وليدل.
د افغانستان په ختیځ کې د ملګرو ملتونو د کډوالو ادارې UNHCR د ملاتړ څانګې مسؤل او سرپرست مشر یوسف مزي ګواني د یوه پلاوي په مشرۍ د ننګرهار پوهنتون له رئيس پوهاند دوکتور خليل احمد بهسودوال سره وليدل.
په ياده لیدنه کې، چې د علمي چارو مرستیال پوهندوی دوکتور محمد حامد کډوال، د محصلانو چارو مرستيال پوهنوال سيد اکرم هاشمي او د پوهنتون د بهرنیو اړیکو کمېټې مشر پوهنمل دوکتور محمد دوست صافي هم په کې حضور درلود، دواړو خواوو د کډوالو او بې وزلو محصلینو لپاره په پوهنتون کې د زده کړو د غوره چاپېریال رامنځته کولو په اړه خبرې اترې وکړې.
ښاغلي ګواني د المان سفارت په مرسته د پوهنتون ادارې ته د لسو سکالرشیپونو د ورکړې خبره وکړه، چې له لارې به یې د پوهنتون لس تنه هغه بې وزله محصلین، چې هېواد ته نوی راستانه شوي او پوهنتون ته نوی جذب شوي وي، د لیسانس دورې د څلورو کلونو په موده کې مالي ملاتړ ترلاسه کړي.
د یادې ادارې د اړیکو او پروګرامونو مسؤل محمد ایمل وویل: اداره یې له ننګرهار پوهنتون سره د څېړنو او نورو علمي برخو کې د ګډ کار لېوالتیا لري او ډېر ژر به د دواړو ادارو تر منځ د یو تفاهملیک د رامنځته کېدو پر مسوده کار وکړي او د تفاهملیک په رڼا کې به متقابلو اړیکو او همکاریو ته دوام ورکړي.
د ننګرهار پوهنتون رئیس پوهاند دوکتور خليل احمد بهسودوال د پوهنتونونو او ذیربطو ادارو تر منځ د ګډو همکاریو پر شونتیا او ارزښت خبرې وکړې او د مننې تر څنګ یې راغلي پلاوي ته ډاډ ورکړ، چې د یوه شفاف میکانېزم له لارې به ورته یاد محصلین ور وپېژني.
