د ننګرهار پوهنتون مرکزي کمپس دویمه دروازه هم په اساسي توګه جوړېږي.
یاده دروازه، چې کوچنی پارک، ډبرین کتاب، ګلدانونه او نور ملحقات هم لري، د ژبو او ادبیاتو پوهنځي د مخکېني رئیس او استاد ارواښاد شهید پوهاند مسعود نېکبخت د کورنۍ او دوستانو په مالي مرسته جوړېږي.
یاده ژمنه د ارواښاد استاد مشر زوی د ننګرهار د سوداګرۍ او صنایعو رئیس محمد حسن محسن د ننګرهار پوهنتون رئیس پوهاند دوکتور خلیل احمد بهسودوال سره د لیدنې پر مهال وکړه.
پوهاند بهسودوال د ارواښاد استاد نېکبخت د ترسره کړیو خدمتونو یادونه وکړه؛ نوموړي وویل: شهید استاد نېکبخت د خپل خوږ عمر زیاته برخه د هېوادوالو په خدمت او د ادبياتو په برخه کې د هېواد د بچيانو په روزنه کې تېره کړه، چې علمي، تدریسي او اکاډمیک خدمتونه یې تلپاتې او د ننګرهار پوهنتون تاریخ کې په زرینو کرښو لیکل شوي دي.
نوموړي خوښي وښوده، چې د پوهاند نېکبخت د کورنۍ غړي هم د ارواښاد استاد پلیوني دي او د ننګرهار پوهنتون سره په مرستې یې خپله مینه له علمي او تحصیلي بنسټونو سره په زبات ورسوله.
ښاغلي محسن د ننګرهار پوهنتون د مشرتابه مننه وکړه او زیاته یې کړه، چې ننګرهار پوهنتون د ټولو افغانانو ګډ علمي کور دی او ددې کور علمي او رغنیزه مرسته د هر افغان دنده او مسؤلیت دی.
د مجلس په پای کې د پوهنتون د مشرتابه له خوا د یادې دروازې رغنیز پلان او نقشه ښاغلي محسن ته وسپارل شوه او هم یې د تطبیق له ساحې څخه لیدنه وکړه.
