ننګرهار پوهنتون سره د لاس وینځلو آبدانونو او سلګونه کلچې صابون مرسته وشوه
په ننګرهار پوهنتون کې د کرونا او نورو ناروغیو خپرېدو څخه د مخنیوي په موخه د اکټیډ افغانستان بنسټ له خوا د لاس وینځلو آبدانونو او سلګونه کلچې صابون مرسته وشوه او نن ورځ په ختیځ کې د نوموړي بنسټ د مسؤل محمد عارف عارف له خوا د پوهنتون مشرتابه ته وسپارل شول.
د ننګرهار پوهنتون رئيس پوهاند دوکتور خليل احمد بهسودوال د اکټیډ افغانستان ادارې مننه وکړه، چې له دې وړاندې یې د دېرش زرو ماسکونو مرسته کړې وه او نن یې یو ځل بیا د یادو توکیو مرسته وکړه.
نوموړي وویل: مرسته شوي آبدانونه او صابون به د پوهنتون په مناسبو ځایونو کې کېږدي، چې محصلین، مراجعین او استادان ترې ګټه پورته کړي.
په ختیځ کې د اکټيډ افغانستان ادارې مشر محمد عارف عارف د شوې مرستې په اړه د غونډې برخوالو ته معلومات ورکړل او زیاته یې کړه، چې ننګرهار پوهنتون د ټولو افغانانو ګډ کور دی او دا د هر افغان دنده او مسؤلیت دی، چې د خپل توان سره سم یې په علمي او مادي رغاونه کې ونډه واخلي.
د یادونې وړ ده، چې د مرسته شویو توکیو د سپارلو پر مهال د ننګرهار پوهنتون مرستیالانو، د یو شمېر پوهنځیو رئیسانو، استادانو او اداري کارکوونکو هم حضور درلود.
