د ننګرهار پوهنتون محصلینو ته د غوره ویناوالۍ ۶ ورځنی سيمینار پای ته ورسېد.
یاد سيمينار د لوړو زده کړو وزارت په هدایت او د محصلانو خدمتونو همغږۍ امریت په هڅو د ژورنالېزم او ارتباطاتو او ژبو او ادبیاتو پوهنځیو د څلورمو ټولګیو (۴۵) تنو محصلینو ته جوړ شوی و.
د ورکشاپ په لړ کې د ژونالېزم او ارتباطاتو پوهنځي استاد پوهندوی خوشحال جبارخېل د یادو پوهنځیو محصلینو ته د ښې ویناوالۍ مهارت زده کولو په اهمیت د خبرو کولو تر څنګ د ښې وینا او اغېزناک ویناوال ځانګړتیاوو، د وینا جوړښت، موضوع ټاکنه، پر ځان د باور زیاتوالي او وېرې کنټرول، د وینا ډولونه او د غوره ویناوالۍ ګڼې تخنیکي او مسلکي برخې تشریح کړې او د محصلینو پوښتنو ته یې ځوابونه ورکړل.
ګډونوالو محصلینو د ورکشاپ له تنظیموونکو څخه د مننې تر څنګ زیاته کړه، چې د ورکشاپ پر مهال یې معلومات پراخه او د عملي تمرینونو په ترسره کولو سره یې ډېر څه زده کړل.
