د لوړو زده کړو وزارت علمي معین د ننګرهار پوهنتون کرنې پوهنځي د ماسترۍ دورې محصلینو له روانو څېړنیزو پروژو لیدنه وکړه.
د لوړو زده کړو وزارت علمي معین دوکتور لطف الله خیرخواه ننګرهار پوهنتون ته په خپل کاري سفر کې د پوهنتون د علمي چارو مرستیال پوهندوی مولوي احسان الله ناصح په ملتیا د کرنې پوهنځي د ماسترۍ برنامو د لسګونه تنو محصلینو د څېړنیزو پروژو څخه، چې د ننګرهار ولایت په مختلفو سيمو کې روانې دي، لیدنه وکړه.
ښاغلي خیرخواه د ننګرهار پوهنتون د یادو محصلینو له لوري په ترسره کېدونکو څېړنو خوښي وښوده او زیاته یې کړه، چې یادې څېړنې به د کرنیز سکتور په میکانیزه کېدو کې اغېزمنې تمامې شي.
نوموړي څېړونکو محصلینو څخه د مننې تر څنګ د پوهنتون مسؤلینو ته سپارښتنه وکړه، چې د یادو څېړنو پایلې د بشپړېدو په صورت کې له اړوندو سکتوري ادارو سره شریکې کړي.
