د ننګرهار پوهنتون وترنري علومو پوهنځي خپلې همکارې ادارې وستایلې.
په همدې پار د یاد پوهنځي له لوري په جوړه شوې ستاینغونډه کې، د بېلابېلو امارتي، خصوصي او سکتوري ادارو استازو برخه لرله، چې پر مهال یې د راتلونکو همکاریو پراختیا، د لومړیتوب په اساس د څېړنو ترسراوي او کریکولم غني کولو په اړه خبرې او نظریات وړاندې شول.
په یاده غونډه کې د وترنري علومو پوهنځي رهبرۍ سربېره د امارتي او خصوصي سکتورونو مسؤلینو، استازو، مسلکي غړو، استادانو، د پوهنتون منسوبینو او محصلینو ګډون کړی و.
د غونډې د پرانیستې وینا پر مهال د وترنري علومو پوهنځي رئیس پوهنوال رضوان الله ممله وال د خپل پوهنځي محصلینو عملي زده کړو، څېړنیزو پروژو زمینه سازۍ او ظرفیت لوړونې برنامو ایجاد په برخه کې د همکارو ادارو له تېرو مرستو او همکاریو مننه وکړه او د هغوی له خوا مختلفو برخو کې د محصلینو روزنې اړوند د ترسره کړیو فعالیتونو یادونه یې وکړه.
نوموړي د محصلینو عملي زده کړو او مسلکي مهارتونو لوړاوي په برخه کې د یادو ادارو هلې ځلې وستایلې او د هغوی همکاري یې قابل قدر او اړینه وبلله.
د غونډې پر مهال د وترنري علومو پوهنځي استاد او د څېړنې کمېټې مشر پوهندوی دوکتور احمد فرید روان د پریزنټېشن په شکل د غونډې برخه والو ته د همکارو بنسټونو د ملاتړ او همکارۍ په اړه تفصیلي معلومات وړاندې کړل.
د کرنې اوکانال ریاستونو، افغان طیور امارتي شرکت، ختیځ لبنیاتو او د افغانستان وترنري علومو، د کبانو، شاتو مچیو د روزونکو او پولټري ډاکترانو د اتحادیو مسؤلینو د غونډې په پای کې د محصلینو لپاره په ګټورو څېړنو خبرې وکړې او د کریکولم غني کېدا په موخه یې خپل نظریات وړاندې کړل.
غونډه د همکارو ارګانونو مسؤلینو او استازو ته د ستاینلیکونو په ورکړې سره پای ته ورسېده.
