د ننګرهار پوهنتون له اقتصاد پوهنځي څخه ۱۳۹ تنه فارغ شول.
د ننګرهار پوهنتون اقتصاد پوهنځي له مالي او بانکي، اداره او مدیریت، سوداګرۍ او ملي اقتصاد څانګو څخه په ۳۹ مه دوره کې ۱۳۹ تنه علمي کادرونه فارغ او ټولنې ته د خدمت په موخه وړاندې شول.
په همدې پار ستاره شرق هوټل کې د فراغت غونډه جوړه شوې وه، چې په کې د ننګرهار پوهنتون رئیس، د مالي او اداري چارو مرستیال، د اقتصاد پوهنځي رئیس او استادانو، فارغانو او د هغوی د کورنیو غړو برخه درلوده.
د ننګرهار پوهنتون رئیس شیخ انعام الله مدني غونډې ته د وینا پر مهال فارغانو ته مبارکي وویله او د ټولنې د پرمختګ او اقتصادي ثبات اړوند یې د هغوی پر رول خبرې وکړې.
نوموړي فارغانو ته په خطاب کې وویل: په خپل مسلک کې باید په کافي اندازه پوهه او مهارت ترلاسه او د هېواد اقتصادي، سوداګریز او مالي نظام پایداره ساتلو او ښه مدیریت کې برخه واخلي.
د پوهنتون رئیس هیله څرګنده کړه، چې اســلامي امـــارت به فارغو ځوانانو ته د هغوی د وړتیا له مخې هېواد ته د خدمت کولو زمینه مساعده کړي.
د ننګرهار پوهنتون د مالي او اداري چارو مرستیال پوهنیار قاضي خالد صداقت هم د خپلو خبرو پر مهال محصلینو ته مبارکي ورکړه، ټولنه کې د اقتصاد پوهانو په ارزښت یې خبرې وکړې او زیاته یې کړه، چې له اقتصاد پوهنځي څخه فارغان کولی شي،د خپلې اقتصادي پوهې او وړتیا پر مټ د نظام په اداري چارو کې موثریت او هغوی ته د بریالیتوب فرصتونه برابر کړي.
نوموړي فارغانو ته سپارښتنه وکړه، څرنګه چې لازمه ده د هېواد پرمختګ ته کار وکړي او افغانستان په اقتصادي ډګر کې د نړۍ هېوادونو سره سیال کړي.
غونډه د پوهنتون رهبرۍ غړو او استادانو له لوري فارغانو ته د سندونو او ستاینلیکونو په ورکړې سره پای ته ورسېده.
سرچینه: د عامه اړیکو، اطلاعاتو او نشراتو آمریت
