د ننګرهار پوهنتون اداري او تقرر- انفکاک مجلسونه ددې پوهنتون د رئيس په مشرۍ ترسره شول.

په يادو کاري ناستو کې، چې د ننګرهار پوهنتون په رياست مقام کې ترسره شوې او ددې پوهنتون د علمي چارو، مالي او اداري چارو مرستيالانو، اړوندو پوهنځيو او تدريسي روغتون رئيسانو او ځينو آمرينو په کې برخه لرله، د پوهنتون مالي، اداري، د استادانو تقرر، انفکاک او يو شمېر نورو مسايلو په اړه په کې بحث او پرېکړې وشوې.
د ننګرهار پوهنتون رئيس شــيخ انعام الله مدني د پرانيستې وينا پر مهال په اداري چارو کې د لا زياتې همغږۍ رامنځ ته کولو، د استادانو او مامورينو په حاضرۍ او دندې ته پر ټاکلي وخت راتللو باندې ټينګار وکړ او د پوهنځيو رئيسانو ته يې سپارښتنه وکړه، چې د خپلو پوهنځيو هر اړخيز نظم او د محصلينو تدريسي بهير ته جدي پاملرنه وکړي.
د ننګرهار، کنړ، لغمان او باميان پوهنتونونو د تقرر او انفکاک ۸ کيسونه او نور متفرقه مالي او اداري مسايل هغه څه وو، چې د يادو مجلسونو پر مهال يې په اړه بحث او لازمې پرېکړې وشوې.
سرچينه: د عامه اړيکو، اطلاعاتو او نشراتو امريت