د ننګرهار د خصوصي پوهنتونونو او لوړو زده کړو موسسو مسؤلینو د ننګرهار پوهنتون مشرتابه سره غونډه وکړه.
د ننګرهار ولایت د ۷ (خراسان، الفلاح، سپین غر، روښان، التقوا، اریانا او تابش) خصوصي پوهنتونونو او لوړو زده کړو موسسو مسؤلینو د ننګرهار پوهنتون رئیس، مرستیالانو او د نړیوال کنفرانس اجرائیه بورد غړو سره مشورتي ناسته وکړه.
د ننګرهار پوهنتون رئیس پوهاند بهسودوال او د نړیوال کنفرانس د اجرائیه بورد مسؤلینو په دې پوهنتون کې د دایرېدونکي د اقلیم بدلون نړیوال کنفرانس کې د خصوصي پوهنتونونو او لوړو زده کړو موسسو پر ونډې بحث وکړ او د خپلو استادانو د علمي مقالو د سپارلو تر څنګ یې د کنفرانس په علمي او اجرایوي چارو کې د هغوی د فعال ګډون سپارښتنه وکړه.
د خصوصي پوهنتونونو او لوړو زده کړو موسسو مسؤلینو د ننګرهار پوهنتون د مشرتابه مننه وکړه، چې د اقلیم بدلون مهمې موضوع په اړه یې د نړیوال کنفرانس تابیا کړې او د یاد کنفرانس د تنظیم په چارو کې یې د همکارۍ ژمنه وکړه.
سرچینه: د اړیکو، نشراتو او عامه پوهاوي آمریت
