په ختیځ کې د ملګرو ملتونو د کډوالو ادارې مسؤلینو د ننګرهار پوهنتون له مشرتابه سره وليدل.
د افغانستان په ختیځ کې د ملګرو ملتونو د کډوالو ادارې UNHCR د پروګرامونو مسؤل انجنیر دوست احمد احمدي د یوه پلاوي په ملتیا د ننګرهار پوهنتون رئيس پوهاند دوکتور خليل احمد بهسودوال سره وليدل.
په ياده لیدنه کې، چې د لوړو زده کړو وزارت فوق العاده استازي او د پوهنتون د اداري او مالي چارو مرستیال پوهنیار قاضي خالد صداقت، د علمي چارو مرستیال پوهندوی احسان الله ناصح، د محصلانو چارو مرستيال سید محمد قاسم هاشمي، د حقوقو پوهنځي، حقوقي کلینیک او د لیلیو عمومي مدیریت مسؤلینو هم په کې حضور درلود، دواړو خواوو په حقوقي برخه کې د محصلینو لپاره د عملي زده کړو زمینې برابرولو، کډوالو محصلینو ته د سکالرشيپونو شمېر زیاتوالي، د نجونو مرکزي لیلیه کې د یوه مجهز کمپیوټر لیب او نهاري محصلینو ته د یوې انتظارګاه جوړولو په اړه خبرې اترې وکړې.
ښاغلي احمدي وویل: اداره یې په پام کې لري، چې د ننګرهار پوهنتون حقوقي کلینیک په چوکاټ کې محصلینو ته د عملي زده کړو زمینه برابره کړي او ددې تر څنګ به په نږدې راتلونکې کې د نجونو په مرکزي لیلیه کې یو مجهز کمپیوټر لیب فعال کړي.
د ننګرهار پوهنتون رئیس پوهاند دوکتور خليل احمد بهسودوال او د لوړو زده کړو وزارت فوق العاده استازي او د پوهنتون د اداري او مالي چارو مرستیال پوهنیار قاضي خالد صداقت په تېر کې د ننګرهار پوهنتون سره د ملګرو ملتونو د کډوالو ادارې د مرستو او همکاریو یادونه وکړه او د مننې تر څنګ یې د هغې پر دوام ټینګار وکړ.
د پوهنتون مشرتابه د نجونو د مرکزي لیلیې د احاطې، نهاري محصلینو انتظارګاه، د پوهنتون نورو لیلیو ته د ورته اسانتیاوو برابرولو او کډوالو محصلینو ته د سکالرشیپونو شمېر زیاتوالي په برخه کې د راغلي پلاوي څخه د مرستې غوښتنه وکړه.
د راغلي پلاوي مشر انجنیر احمدي د پوهنتون مشرتابه ته ډاډ ورکړ، چې ذکر شوي وړاندیزونه به یې د خپلې ادارې له مشرانو سره شریک کړي.
د مجلس په پای کې راغلي پلاوي د پوهنتون د مشرتابه په ملتیا د نجونو مرکزي لیلیې د نیمه کاره ودانۍ څخه لیدنه وکړه.
