ننګرهار پوهنتون کې د ۱۴۰۰ لمریز کال کانکور ازموینې د چمتووالي غونډه جوړه شوه.
په نوموړې کاري ناسته کې، چې د پوهنتون د رئیس پوهاند دوکتور خلیل احمد بهسودوال په مشرۍ ترسره شوه، د محصلانو چارو مرستيال پوهنوال سيد اکرم هاشمي، د اداري او مالي چارو مرستیال مسعود پیروزي، د استادانو چارو، محصلانو چارو، اړیکو او نشراتو، خدماتو او د لیلیو مسؤلینو برخه لرله.
د مجلس پر مهال د ننګرهار پوهنتون رئیس پوهاند دوکتور خلیل احمد بهسودوال اړوندو مسؤلینو ته د کانکور د راتلونکې ازموینې لپاره د اړینو تدابیرو نیولو او لازم چمتووالي سپارښتنه وکړه.
د بایومتریک او ازموینې لپاره د مناسبو محلونو جوړول، د ممتحنو استادانو ټاکل، کارتونو توزیع، د لارښودو لوحو چاپ او نصبول، امنیت، له رسنیو د کانکور اړوند خبرتیاوو او معلوماتو خپرول هغه موضوعات وو، چې په غونډه کې پرې بحث او خبرې اترې وشوې.
د ازموینو ملي ادارې له پلان سره سم د ننګرهار د کانکور ازموینې بایومتریک پروسه د ثور په (۷،۶،۵) نېټه د یکشنبې، دوشنبې او سه شنبې په ورځو او د کانکور ازموینه د ثور په (۱۰،۹،۸) نېټه د چهارشنبې، پنجشنبې او جمعې په ورځو کې په ننګرهار پوهنتون کې اخیستل کېږي.
