ننګرهار پوهنتون کې د ختیز زون د دولتي پوهنتونونو د امامانو او مبلغانو بستونو لپاره ازموینه واخیستل شوه.
یاده ازموینه د عقرب په ۲۴ او ۲۵ نېټه د شیخ شاکرالله وحدت په مشرۍ د لوړو زده کړو وزارت څخه د راغلي پلاوي له خوا د ننګرهار، کونړ، لغمان او نورستان پوهنتونونو د ۵ بستونو لپاره له ۳۰ تنو علماوو څخه واخیستل شوه.
د لوړو زده کړو وزارت د دعوت او ارشاد رئیس شیخ شاکرالله وحدت د ازموینې د پرانیستې مراسمو ته وینا پر مهال ګډونوالو ته ډاډ ورکړ، چې د ننګرهار پوهنتون د ممتحنه هیئت سره په ګډه یې د ازموينې د روڼتیا او شفافیت په برخه کې تر ممکنه حده هلې ځلې کړي دي.
نوموړي د ازموینې پروسې په اړه کاندیدو علماوو ته معلومات ورکړل او زیاته یې کړه، چې ازموینه به په تمامه معنی شفافه واخلي او د عدالت له مخې به حق حقدار ته وسپاري.
د یادونې وړ ده، چې د ازموینې په ممتحنه هیئت کې د شیخ شاکرالله وحدت تر څنګ د لوړو زده کړو وزارت د ارزیابۍ ریاست ممتحن مولوي محمد هاشم برخه لرله او د ازموینې د انسجام چارې د ننګرهار پوهنتون د بشري سرچينو آمر حسین احمد سمندر په غاړه وې.
