ننګرهار پوهنتون کې (د اسلامي شریعت له نظره د مور او ماشوم روغتیا او د واکسینو تطبیق) په اړه د عامه پوهاوي ورکشاپ جوړ شو.
په نوموړي دوه ورځني ورکشاپ کې، چې د لړم په ۱۶مه د اسلامي مشورتي ګروپ او د روغتیا د نړیوالې ادارې له خوا د پوهنتون په (PDC) مرکز کې جوړ شوى، د ننګرهار پوهنتون د شرعیاتو پوهنځي د وروستي کال ۵۰ تنه محصلین برخه لري.
د ورکشاپ د پرانيستې پر مهال د ننګرهار پوهنتون رئیس پوهاند دوکتور خلیل احمد بهسودوال د امراضو د کنترول او مخنیوي په برخه کې د واکسینو د رول په اړه خبرې وکړې او د هغې منظم تطبیق یې د ټولنې مهمه اړتیا وبلله.
نوموړي وویل: اسلامي شریعت د یوه بشپړ او کامل دین په توګه د انساني ژوند د نورو اړخونو تر څنګ د روغتیا، حفظ الصحې، نظافت او پاکۍ په اړه ګڼې لارښوونې او پیغامونه لري، چې رسول یې د ټولنې د ټولو وګړو او په ځانګړې توګه د علماوو او پوهانو دنده او مسؤلیت دی.
پوهاند بهسودوال ګډونوالو محصلینو ته سپارښتنه وکړه، چې له ورکشاپ اعظمي استفاده وکړي او د ټولنې وګړو ته په رسولو کې یې خپل مسؤلیت په سمه توګه ادا کړي.
په افغانستان کې د اسلامي مشورتي ګروپ استازي شمس الرحمن فروتن د خپلې ادارې او همدارنګه د ورکشاپ د موخو په اړه ترتیب کړی پریزنټیشن د ورکشاپ ګډونوالو ته وړاندې کړ.
ټاکل شوې، چې په دې دوه ورځني ورکشاپ کې به د فلج ناروغۍ، د پولیو او نورو معمول واکسینونو د شرعي حکم، د اسلامي شریعت او طب له نظره د اجباري ودونو، نظافت او پاکۍ، د مور او ماشوم روغتیا او ځینو نورو مسایلو په اړه بحثونه ترسره شي.
د یادونې وړ ده، چې د ورکشاپ د پرانیستې په مراسمو کې د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستیال پوهنیار قاضي خالد صداقت، د فوق لیسانس برنامو آمر پوهنوال دوکتور نجیب الله صالح، د علمي تحقیقاتو مرکزي کمېټې مشر پوهنمل محمد ملیار رحماني او د کتلوي معافیت ادارې ځینو مسؤلینو برخه لرله.
