ننګرهار پوهنتون کرنې پوهنځي کې د ۷ څېړنیزو پروژو پرانیسته وشوه

د مسؤلینو په وینا، یادې څېړنې د هندوستان کرنیز تحقیقاتي پوهنتون (IARI) د ماسترۍ دورې افغان محصلینو له خوا د ننګرهار پوهنتون کرنې پوهنځي د استادانو په لارښوونه ددې پوهنتون په تحقیقاتي فارم کې د شپږو میاشتو په موده کې د مېوو، سبزیو او ګلانو پر بوټو او حیواناتو ترسره کېږي.

په همدې مناسبت د کرنې په پوهنځي کې غونډه جوړه شوې وه، چې د ننګرهار پوهنتون د رئیس، مرستیالانو، د پوهنځیو رئیسانو او استادانو سربېره په کې د ننګرهار ولایت مقام اداري او مالي مرستیال او د یو شمېر کرنیزو موسساتو مسؤلینو برخه لرله.

د ننګرهار پوهنتون رئیس پوهاند دوکتور خلیل احمد بهسودوال د یادو پروژو د پرانیستې پر مهال د څېړنو او علمي تحقیقاتو په اړتیا او اهمیت خبرې وکړې او یاده چاره یې د پوهنتونونو اصلي دنده او مکلفیت وباله.

نوموړي د هندوستان هېواد د نړیوال کرنیز تحقیقاتي پوهنتون د محصلینو له خوا په ننګرهار پوهنتون کې ددې پوهنتون د استادانو په لارښوونه د څېړنو ترسره کول لویه لاسته راوړنه وبلله، چې په وینا، دا زمونږ په پوهنتون د نړیوالو باور په ګوته کوي.

د ننګرهار مرستیال والي پوهنوال ببرک میاخېل، د کرنې پوهنځي رئیس پوهندوی دوکتور رشاد احمد شېرزاد، د یاد پوهنځي استاد پوهاند میرحاتم نیازی او د لغمان پوهنتون رئیس پوهندوی دوکتور عصمت الله درانی د غونډې نور ویناوال وو، چې ټولو په وار سره د یادو څېړنو په پیل خوښي وښوده او هغه يې د کرنې پوهنځي محصلینو د عملي زده کړو سربېره په اړونده برخه کې د کرنیز سکتور د شته ستونزو د هواري لپاره ګټورې وبللې.

د پروژو د څېړونکو په استازیتوب د ننګرهار پوهنتون د کرنې پوهنځي استاد پوهنیار طیب الله زاهد خبرې وکړې. نوموړي وویل: مونږ ۷ تنو محصلینو، چې څلور تنه د ننګرهار، کونړ سیدجمال الدین افغاني او بغلان پوهنتونونو استادان او درې تنه نور ازاد محصلین دي، خپل درسي بهیر د هندوستان کرنیز تحقیقاتي پوهنتون کې بشپړ کړی، چې اوس خپل تحقیقونه د نوموړي پوهنتون په لارښوونه او موافقه په ننګرهار پوهنتون کې ترسره کوو.

نوموړي د ننګرهار پوهنتون او کرنې پوهنځي له مشرتابه مننه وکړه، چې دوی ته یې د څېړنو د ترسراوي زمینه برابره کړه.