د پروان پوهنتون محصلینو له ننګرهار پوهنتون څخه لیدنه وکړه.
د پروان پوهنتون د اجتماعي علومو پوهنځي جغرافیه څانګې ۲۶ تنه محصلینو د یاد پوهنځي د یو شمېر استادانو په ملتیا ننګرهار پوهنتون ته په علمي سیر راغلل او ددې پوهنتون له بېلابېلو برخو، علمي، تحقیقاتي او تدریسي امکاناتو څخه یې لیدنه وکړه او په اړه یې معلومات ترلاسه کړل.
راغلو محصلینو او استادانو د ننګرهار پوهنتون رئیس شیخ انعام الله مدني او د علمي چارو مرستیال پوهندوی مولوي احسان الله ناصح سره د پوهنتون په ریاست مقام کې ولیدل او د پوهنتون اړوند یې هغوی سره خپل مشاهدات او تاثرات شریک کړل.
د ننګرهار پوهنتون رهبرۍ غړو په خپلو خبرو کې راغلو محصلینو ته ښه راغلاست ووایه، د علمي سفرونو په ارزښت یې خبرې وکړې او دغه چاره یې د محصلینو په روزنه کې ګټوره وبلله.
د پروان پوهنتون محصلینو سره راغلو لارښود استادانو د ننګرهار پوهنتون له مشرتابه مننه وکړه، چې د دوی محصلینو ته یې د پوهنتون لیدنې زمینه برابره کړه.
