د ننګرهار پوهنتون ښوونې او روزنې پوهنځي کې د لومړي ځل لپاره د استادانو د تدریسي فعالیتونو انلاین ثبت پروسه پیل شوه.
یاده پروسه د ښوونې او رزونې پوهنځي د رئیس په لارښوونه او ددې پوهنځي د الکترونیکې زده کړو کمېټې او کیمیا څانګې مسؤلینو په هلو ځلو د کيمیا څانګې استادانو له لوري پیل شوه، چې ټولو څانګو ته به وغځېږي.
د ښوونې او روزنې پوهنځي رئیس پوهنمل محمد اسحق شهیدزوی وویل: د استادانو د تدریسي فعالیتونو آنلاین ثبت پروسه یو پرمختللی او نوی ګام دی، چې د انلاین زده کړو عامولو او تقویت په برخه کې به ګټور ثابت شي.
نوموړي د یادې پروسې بېلابېلې ګټې بیان کړې او زیاته یې کړه، چې دا پروسه د وخت سپما، د معلوماتو اسانه لاسرسي، ډیټا تحلیل، د استادانو د فعالیتونو ښه مدیریت، تدریسي بهیر کې نیمګړتیاوو تشخیص او شفافیت ته لاره پرانیزي.
په ورته مهال د ښوونې او روزنې پوهنځي مسؤلینو د خپلو شته امکاناتو څخه په استفادې د محصلینو عملي زده کړو په موخه د بیولوژي څانګې لابراتوار فعال او عملي زده کړو ته چمتو کړی دی.
د ښوونې او روزنې پوهنځي مسؤلین وايي، په دې پوهنځي کې د روانو علمي، تدریسي او رغنیزو چارو څخه وخت په وخت جدي څارنه کوي او د پوهنځي ستونزې یې په خپل وخت حل کړي دي.
