د ننګرهار پوهنتون مشرتابه په یاد پوهنتون کې د څېړنيز مرکز ودانۍ د جوړېدو چارې له نږدې وليدې.
د ننګرهار پوهنتون رئيس شيخ انعام الله مدني په داسې حال کې، چې د پوهنتون د اداري او مالي چارو مرستيال پوهنيار قاضي خالد صداقت او د محصلانو چارو مرستیال پوهنیار حافظ سید محمد قاسم هاشمي يې ملتيا کوله، د څېړنيز مرکز د ودانۍ له رغنيزو چارو ليدنه وکړه.
د لیدنې پر مهال د پوهنتون مشرتابه د ودانیز شرکت مسؤلینو ته لارښوونه وکړه، چې د ودانۍ چارې د BQ سره سمې په ټاکلي وخت پای ته ورسوي.
د ياد مرکز وداني د شهید افسر خان ستانکزي خيريه بنسټ له لوري د ۱۵ میلیونه افغانیو په مالي لګښت د اړینو عصري تجهیزاتو په لرلو سره په ۳ پوړونو کې جوړیږي، چې چارې ۸۰ سلنه بشپړې شوي او پاتې کار به یې نږدې راتلونکي کې سرته ورسېږي.
سرچینه: د عامه اړیکو، اطلاعاتو او نشراتو آمریت
