د ننګرهار پوهنتون مشرتابه پلاوي ددې پوهنتون د مرکزي کمپس د بیرونۍ نما جوړېدو چارو څخه لیدنه وکړه.
د ننګرهار پوهنتون رئيس پوهاند دوکتور خليل احمد بهسودوال په داسې حال کې، چې د اداري او مالي چارو مرستیال پوهنیار قاضي خالد صداقت، د علمي چارو مرستيال پوهندوى احسان الله ناصح او د پوهنتون د چاپېریال ساتنې کمېټې مشر پوهنوال سید اکرم هاشمي یې ملتیا کوله، د پوهنتون د مرکزي کمپس د بیرونۍ نما د جوړېدو چارې له نږدې ولیدي.
د لیدنې پر مهال د پوهنتون مشرتابه د اړوند شرکت مسؤلینو ته لارښوونه وکړه، چې یادې ودانیزې چارې باید له پلان سره سم په معیاري ډول په خپل وخت سرته ورسوي، چې د شرکت د مسؤلینو له خوا ورته د اجرااتو ډاډ ورکړل شو.
د یادونې وړ ده، چې په یاده رغنیزه پروژه کې یو کیلومتر او ۱۲ متره پلې لاره، ویاله، ګلدانونه او په اساسي توګه د پوهنتون د عمومي دروازې جوړېدل شامل دي، چې د جلال آباد ښاروالۍ له خوا د UNOPS ادارې د ۲۳.۴ میلیونه افغانیو په مالي مرسته د درېو میاشتو په موده کې جوړېږي.
