د ننګرهار پوهنتون مشرتابه د وترنري علومو او عامه ادارې او پالیسۍ پوهنځیو جدیدالشمول محصلینوته په جوړو شویو غونډو کې ګډون وکړ.
د ننګرهار پوهنتون رئیس د محصلانو چارو مرستیال په ملتیا د وترنري علومو او عامه ادارې او پالیسۍ پوهنځیو جدیدالشمول محصلینو ته د ښه راغلاست او پوهنتون پېژندنې په موخه جوړو شویو غونډو کې ګډون وکړ او راغلو محصلینو ته یې د نوي علمي سفر او د زده کړو ښه ترسراوي په اړه لازمې لارښوونې او سپارښتنې وکړې.
د ننګرهار پوهنتون رئیس شیخ انعام الله مدني او د محصلانو چارو مرستیال پوهنیار حافظ سید محمد قاسم هاشمي په خپلو خبرو کې د ننګرهار پوهنتون د اهدافو او معیارونو په اړه خبرې وکړې او جدیدالشمول محصلین یې د خپلو زده کړو پر مهال د پوهنتون له امکاناتو څخه سالمې استفادې، استادانو او ټولګیوالو درناوي، د اصولو او مقرراتو رعایت او زده کړو کې کوښښ کولو ته وهڅول.
نوموړو ژمنه وکړه، چې د محصلینو د ټولو حقوقو ملاتړ کوي او هغوی ته به د ښې روزنې په موخه هر راز سهولتونه چمتو کړي.
د غونډو په پای کې د یادو پوهنځیو له خوا جدیدالشمول محصلینو ته د پوهنتون او پوهنځیو د کړنلارو، امکاناتو او تدریسي پلانونو په اړه معلومات ورکړل، چې هغوی له تدریسيبهیر او اداري چارو سره بلدتیا ترلاسه کړي.
