د ننګرهار پوهنتون مشرتابه ددې پوهنتون د دعوت او ارشاد آمریت مسؤلینو سره غونډه وکړه.
په یاده غونډه کې، چې د ننګرهار پوهنتون رئیس او مرستیالانو سربېره د دعوت او ارشاد آمر او د هغه مرستیال برخه درلوده، د یاد آمریت د روانو چارو، پلان شویو اصلاحي برنامو او دعوتي امورو د لا غوره تنظیم او پراختیا په اړه بحث او خبرې وشوې.
د ننګرهار پوهنتون رئیس شـــ/یخ انعام الله مدني په خپلو خبرو کې د دعوت او ارشاد امریت له لوري د پوهنتون محصلینو، مامورینو، اداري او خدماتي کارکوونکو ته د عقیدوي او فکري روزنې، دیني پوهې د کچې لوړتیا او اصلاحي درسونو په برخه کې د هغوی روان فعالیتونه د پام وړ وبلل او سپارښتنه یې وکړه، چې د خپلو درسونو لړۍ لا پراخه او ټول ترینه برخمن کړي.
د ننګرهار پوهنتون د دعوت او ارشاد آمر مــ/ــــولوي مهربان شاه مدني په خپلو خبرو کې د ننګرهار پوهنتون له مشرتابه او مرستیالانو مننه وکړه، چې هر وخت یې د هغوی له لوري په جوړو شویو برنامو کې ګډون کړی، هر اړخیز ملاتړ ورڅخه کوي او ژمنه یې وکړه، چې په خپل ټول توان سره به په اسلامي روحیه د محصلینو، مامورینو، اداري او خدماتي کارکوونکو په روزنه کې هلې ځلې ترسره کړي او هغوی ته به بېلابېلې اصلاحي برنامې مهیا کړي.
سرچینه : د عامه اړیکو، اطلاعاتو او نشراتو امریت
