د ننګرهار پوهنتون مشرتابه، استادانو او محصلینو د افغان سولې په اړه د امریکا د متحده ایالتونو د وړاندیز شوې طرحې په اړه بحث وکړ.
په یاده مشورتي ناسته کې د ننګرهار پوهنتون رئیس پوهاند دوکتور خلیل احمد بهسودوال، د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د یو شمېر پوهنځیو، پوهنتوني کمېټو او سولې مرکز مسؤلینو، استادانو او محصلینو برخه لرله.
د مجلس پر مهال د ملي مصالحې عالي شورا له خوا رالېږل شوې د افغان سولې په اړه د امریکا د متحده ایالتونو د وړاندیز شوې طرحې په اړه هر اړخیز بحث وشو او د یادې طرحې د ځینو مواردو د اصلاح او سمونې په اړه د پوهنتون استادانو او محصلینو خپل نظریات او وړاندیزونه شریک کړل.
د ننګرهار پوهنتون مشرتابه د پلان او پالیسۍ کمېټې مشر او د حقوقو او سیاسي علومو پوهنځي استاد پوهنیار عبدالهادي زماني ته دنده وسپارله، چې د مجلس د غړو له خوا د یادې طرحې د اصلاح او غنامندۍ په اړه ورکړل شوي نظریات او وړاندیزونه راټول او توحید کړي، چې وروسته به د پوهنتون ادارې له خوا اړوندې ادارې ته ولېږل شي.
