د ننګرهار پوهنتون مرکزي کمپس د دویمې دروازې د جوړېدو چارې پیل شوې.
یاده دروازه، چې کوچنی پارک، ډبرین کتاب، ګلدانونه او نور ملحقات لري، د ژبو او ادبیاتو پوهنځي د مخکېني رئیس او استاد شهید پوهاند مسعود نېکبخت د کورنۍ په مالي مرسته جوړېږي.
د یادو رغنیزو چارو د بنسټ ډبره د زمري په ۲۰ مه د ننګرهار پوهنتون رئیس پوهاند دوکتور خلیل احمد بهسودوال له خوا د ارواښاد نېکبخت د مشر زوی- د ننګرهار د سوداګرۍ او صنایعو رئیس محمد حسن محسن په ملتیا په داسې حال کې کېښودل شوه، چې د ننګرهار پوهنتون د علمي چارو او محصلانو چارو مرستیالانو، د ژبو او ادبیاتو پوهنځي رئیس، استادانو او د پوهنتون یو شمېر اداري کارکوونکو هم حضور درلود.
پوهاند بهسودوال د خپلو خبرو پر مهال د شهید استاد نېکبخت د کورنۍ له غړو مننه وکړه، چې د ارواښاد استاد په نقش قدم روان دي او د ننګرهار پوهنتون سره په مرستې یې خپله مینه له علمي او تحصیلي بنسټونو سره په زبات ورسوله.
د پوهنتون رئیس د ارواښاد نېکبخت د ترسره کړیو علمي او اکاډمیکو خدمتونو یادونه وکړه، چې په وینا یې، د ننګرهار پوهنتون په تاریخ کې په زرینو کرښو ثبت دي او د دې څلي په جوړېدو به یې یاد نور هم تازه او تلپاتې شي.
ښاغلي محسن د ننګرهار پوهنتون د مشرتابه مننه وکړه او زیاته یې کړه، چې ننګرهار پوهنتون د ټولو افغانانو ګډ علمي کور دی او ددې کور علمي او رغنیزه مرسته د هر افغان دنده او مسؤلیت دی.
نوموړي وویل، چې یاده دروازه به د اړینو ملحقاتو په لرلو سره د راتلونکو دوو میاشتو په موده کې په اساسي توګه ورغول شي.
