د ننګرهار پوهنتون مرکزي لیلیې جدیدالشمول محصلینو ته د ښه راغلاست او پوهنتون پېژندنې غونډه جوړه شوه.
یاده غونډه ددې پوهنتون د محصلانو خدمتونو انسجام امریت په نوښت د مرکزي لیلیې مخې پارک کې جوړه شوې وه، چې د نویو جذب شویو محصلینو سربېره په کې د ننګرهار پوهنتون رئیس، د محصلانو چارو مرستیال، د دعوت او ارشاد او د محصلانو خدمتونو انسجام آمرینو او د لیلیو عمومي مدیر برخه لرله.
د غونډې د پرانیستې وینا پر مهال د ننګرهار پوهنتون رئیس شیخ انعام الله مدني په خپلو خبرو کې جدیدالشمول محصلینو ته د پوهنتون ارزښتونه بیان کړل او هغوی یې د لوړو زده کړو وزارت توقعاتو او مقاصدو ته متوجه کړل.
نوموړي محصلینو ته سپارښتنه وکړه، چې موجوده وخت زرین فرصت وګڼي او د خپل مرام ترلاسه کولو په لاره کې د هر ډول ستونزو پر وړاندې په کلکه مبارزه وکړي.
ښاغلي مدني نويو راغلو محصلینوته ډاډ ورکړ، چې په پوهنتون کې د ټولو محصلینو حقوق خوندي دي او د پوهنتون اداره به د هغوې د ښې روزنې او ظرفیت لوړونې په موخه لازم او اړین سهولتونه چمتو کړي.
د ننګرهار پوهنتون د محصلانو چارو مرستیال پوهنیار حافظ سید محمدقاسم هاشمي، د پوهنتون د دعوت او ارشاد آمر مولوي مهربان شاه مدني او د محصلانو خدمتونو انسجام آمر قاري بشیر احمد احمدي د غونډې نور ویناوال وو، چې د خپلو ویناوو په ترڅ کې یې نوي راغلي محصلین اکاډمیک چاپېریال سره ځان عیارولو، دیني او تربیتي برنامو کې پراخه ګډون، مطالعې، نظم او دسپلین مراعتولو ته راوبلل.
نوموړو زیاته کړه، چې د پوهنتون ادارې د محصلینو لپاره ټولې لازمې اسانتیاوې برابرې کړي او محصلینو ته په کار ده، چې ټوله پاملرنه خپلو درسونو او علمي فعالیتونو ته واړوي.
د غونډې په وروستۍ برخه کې د محصلانو خدمتونو انسجام امریت مسؤلینو له لوري جدیدالشمول محصلینو ته د پوهنتون د اصولو، مقرراتو، تحصیلي بهیر، مختلفو څانګو، امکاناتو او د ستونزو او غوښتنو شریکولو ادرسونو په اړه مهم معلومات وړاندې کړل، تر څو په پوهنتوني دوره کې په ښه توګه خپلې تحصیلي موخې ترلاسه کړي.
