د ننګرهار پوهنتون له عامه ادارې او پالیسۍ او ژورنالېزم او ارتباطاتو پوهنځیو څخه (۱۵۸) تنه مسلکي کادرونه فارغ شول.
د عامه ادارې او پالیسۍ پوهنځي له عامه ادارې، عامه پالیسۍ او مدیریت انکشاف څانګو څخه ۹۳ تنه او د ژورنالېزم او ارتباطاتو پوهنځي له عامه اړیکو، مطبوعاتو او راډیو- تلویزیون څانګو څخه ۶۵ تنه فارغ او ټولنې ته د خدمت په موخه وړاندې شول.
په همدې مناسبت د جلال اباد ښار ستاره شرق او خلیج کانتیننتال تالارونو کې د فراعت بېلابېلې غونډې جوړې شوې وې، چې د ننګرهار پوهنتون د رئيس او مرستيالانو سربېره په کې د یادو پوهنځيو رئيسانو، استادانو، شیوخ کرامو، اداري کارکوونکو، فارغانو او د هغوی د کورنيو غړو برخه لرله.
د غونډو ښه راغلاست ویناوو پر مهال د عامه ادارې او پالیسۍ پوهنځي رئیس پوهنمل محمد جمال شینواري او د ژورنالېزم او ارتباطاتو پوهنځي رئیس پوهندوی سید سمیع الله سعیدي په خپلو خبرو کې د فارغانو په علمي هڅو، وړتیاوو، تدریسي او روزنیز بهیر او راتلونکو مسؤلیتونو خبرې وکړې او د پوهنتون رهبرۍ او نورو مېلمنو ته یې ښه راغلاست ووایه.
فراغت غونډو ته د ویناوو پر مهال د ننګرهار پوهنتون رئيس شيخ انعام الله مدني، د علمي چارو مرستیال پوهندوی مولوي احسان الله ناصح او د څېړنو او علمي مجلو مرستیال پوهندوی دوکتور سعید محمد وقار فارغانو ته مبارکي ورکړه، د لا زیات علمي پرمختګ دعا یې ورته وکړه او د عامه ادارې او پالیسۍ پوهنځي فارغانو ته یې د سپارښتنې په توګه وویل، چې په خپله کاري ساحه او اړوندو ادارو کې د خدماتو کیفیت لوړاوي، ملي پرمختګ تامین، عدالت او اداري نظام سمون کې رغنده رول ولوبوي.
نوموړو همدارنګه د ژونالېزم او ارتباطاتو پوهنځي فارغانو ته هم سپارښتنه وکړه، چې د قلم، ځوانې انرژۍ او رسنیو له لارې حقایق بیان کړي، د مظلومو مسلمانانو غږ پورته کړي او د خپل دین او هېواد دفاع لپاره خپله مسلکي پوهه استعمال او خپله وجیبه ادا کړي.
د پوهنتون رهبرۍ فارغان د نظام ملاتړ، نورو عالي تحصیلاتو او ټولنه کې د پوهنتون ښه استازیتوب ترسره کولو ته وهڅول او د هغوی له کورنیو یې مننه وکړه، چې د خپلو اولادونو ملاتړ یې کړی دی.
یادې فراغت غونډې فارغانو ته د سندونو په ورکولو سره پای ته ورسېدې.
