د ننګرهار پوهنتون رهبرۍ د اقتصاد پوهنځي د جدیدالشمول محصلینو په ښه راغلاست غونډه کې ګډون وکړ.
د ننګرهار پوهنتون رئیس او د محصلانو چارو مرستیال د اقتصاد پوهنځي جدید الشمول محصلانو ته په نیول شوې غونډه کې هغوی ته اړینې او لازمې سپارښتنې وکړې.
د غونډې پر مهال یادو محصلینو سره د محصلانو خدمتونو انسجام امریت او اقتصاد پوهنځي مسؤلینو له لوري د پوهنتون او اقتصاد پوهنځي په اړه معلومات شریک او ورته رهنمايي وشوه.
د ننګرهار پوهنتون رئیس شیخ انعام الله مدني او د محصلانو چارو مرستیال پوهنیار حافظ سید محمد قاسم هاشمي په خپلو خبرو کې نویو راغلو محصلینو ته ښه راغلاست ووایه، هغوی یې د مسلکي زده کړو تر څنګ دیني او عصري ټېکنالوژۍ زده کړې ته وهڅول او د محصلینو د بریا او هوساینې لپاره د پوهنتون د هڅو په اړه یې خبرې وکړې.
نوموړو یادو محصلینو ته د پوهنتوني او درسي اصولو رعایتولو، د استادانو او ټولګیوالو درناوي او د پوهنتون له علمي او فزیکي شتمنیو څخه د سالمې او مطلوبې استفادې په برخو کې سپارښتنې وکړې.
د اقتصاد پوهنځي رئیس پوهنمل محمد صادق رهنما جدیدالشمول محصلینو ته په جوړه شوې یاده غونډه کې د محصل مکلفیتونو او مسؤلیت پذیرۍ په اړه خبرې وکړې او هغوی ته یې د خپل پوهنځي په اړه معلومات وړاندې کړل.
