د ننګرهار پوهنتون د پلان او پالېسۍ او تضمین کیفیت کمېټو غړو ته ( د ستراتېژیک پلان مدیریت، ارزښت او اړتیا) تر سرلیک لاندې یو ورځنی ورکشاپ دایر شو.
یاد ورکشاپ چې موخه ترې د ګډونوالو ظرفیت لوړونه وه، د ننګرهار پوهنتون د علمي چارو معاونیت له لوري د پوهنځیو په کچه (د تضمین کیفیت او پلان او پالېسۍ) کمېټو غړو ته دایر شو.
د یاد ورکشاپ پر مهال به روزونکي استادان هر یو پوهنمل عبدالهادي زماني او پوهنیار احسان الله بیان د پلان اړوند ټول اصطلاحات او ستراتېژیک پلان سره تړلي موضوعات تشریح او واضح کړي.
د ننګرهار پوهنتون د علمي چارو مرستیال پوهندوی مولوي احسان الله ناصح د یاد ورکشاپ په اړتیا او مقصد خبرې وکړې او زیاته یې کړه، چې د ستراتېژیک پلان اړوند معلومات ترلاسه کول او په اهمیت یې پوهېدل د پوهنتون اوږدمهاله پرمختګ ته لار هواروي.
نوموړي د ورکشاپ له استادانو د مننې تر څنګ د کمېټو غړو ته سپارښتنه وکړه، چې د ورکشاپ له معلوماتو د خپلو چارو په سمون کې ګټه واخلي او نورو سره یې هم شریک کړي.
د اجنډا له مخې یاد ورکشاپ په دوو برخو وېشل شوی، چې لومړۍ برخه کې به یې د یادو کمېټو د دندو لایحې، کاري پلانونه او د کاري پلانونو تطبیقي راپور جوړونې په هکله خبرې او معلومات وړاندې شي او دویمه برخه کې به د ننګرهار پوهنتون د ستراتېژیک پلان جوړښت، د ستراتېژیک تطبیقي پلان او د هغې د راپور څرنګوالي، د لیکل شوي راپور ارزونې او مالي پلان واحد فارمټ جوړېدو باندې بحث او معلومات وړاندې شي.
په پای کې به د عملي کار تر څنګ د نظریاتو او معلومات تبادله هم ترسره شي.
