د ننګرهار پوهنتون د نوي سمستر درسونه به د مرغومي په ۳مه نېټه پيل شي.
د لوړو زده کړو وزارت د رالېږلې طرحې او د ننګرهار پوهنتون د علمي شورا د پرېکړې له مخې به ددې پوهنتون د نوي سمستر درسي بهیر د مرغومي/جدي په ۳مه نېټه پیل شي.
یاده پرېکړه د ننګرهار پوهنتون د علمي شورا په هغه غونډه کې وشوه، چې د لیندۍ په ۲۹مه نېټه د دې پوهنتون د رئیس پوهاند دوکتور خلیل احمد بهسودوال په مشرۍ ترسره شوه.
په نوموړې کاري ناسته کې، چې د پوهنتون مرستیالانو، د بېلابېلو پوهنځيو او تدريسي روغتون رئيسانو او استادانو په کې برخه لرله، د یادې پرېکړې سربېره په یو شمېر نورو علمي او تدریسي موضوعاتو بحث او خبرې وشوې.
د ننګرهار پوهنتون رئیس پوهاند دوکتور خلیل احمد بهسودوال د مجلس د پرانیستې وینا پر مهال د تېر سمستر او د ازموینو بهیر د بریالي ترسراوي له امله د پوهنځیو د مسؤلینو او استادانو مننه وکړه او د نوي سمستر درسونو د پیل لپاره د اړین چمتووالي په اړه یې ورته لارښوونې وکړې.
د اداري او مالي چارو مرستیال پوهنیار قاضي خالد صداقت، د علمي چارو مرستیال پوهندوی احسان الله ناصح او د محصلانو چارو مرستیال حافظ سید محمد قاسم هاشمي د مجلس نور ویناوال وو، چې اړوندو مسؤلینو ته یې د نوي سمستر لپاره د مهال وېش جوړولو، د سمستر د پیل په اوله اوونۍ کې جدید الشمول محصلینو ته د ښه راغلاست غونډو نیولو او هغوی ته د کریډیټ، نظم او دسپلین، لیلیې او نورو لوایحو او مقرراتو په اړه د معلوماتو ورکولو سپارښتنه وکړه.
د طب پوهنځي په چوکاټ کې د درېو نورو پوهنځیو ایجاد، انستیتیوت ته د ښوونې او روزنې پوهنځي ارتقاء، د کرنې پوهنځي په دوه څانګو کې د ماسترۍ برنامو ایجاد، د طب او ساینس پوهنځیو د ځینو استادانو د تقاعد تمدید وړاندیزونه، د ننګرهار، لغمان او نورستان پوهنتونونو د استادانو د علمي ترفيعاتو ۲، تثبیت ۱ او د تقرر او انفکاک ۹ کيسونه نور هغه موضوعات وو، چې په اړه یې بحث او لازمې پرېکړې وشوې.
