د ننګرهار پوهنتون د ازموینو کمېټې غړو ددې پوهنتون د رئيس په مشرۍ غونډه وکړه.
د ننګرهار پوهنتون رئیس پوهاند دوکتور خلیل احمد بهسودوال مجلس ته د وینا پر مهال د ازموینو د مرکزي کمېټې د مشرتابه او غړو د تېرو کړنو او فعالیتونو مننه وکړه، چې له امله یې د پوهنتون ازموینې تر ډېره بریده رڼې او معیاري شوي او د اصولو او مقرراتو سره سم یې په راڼه او شفاف ډول د راتلونکو ازموینو د اخیستلو سپارښتنه وکړه.
نوموړي دغه راز د مجلس غړو ته لارښوونه وکړه، چې د ازموینو پر مهال دې محصلینو ته لازمې اسانتیاوې برابرې او د اصولو سره سم دې لازمه مرسته ورسره وشي.
د محصلانو چارو مرستیال پوهنوال سید اکرم هاشمي د ازموینو اخیستنې بهیر د څرنګوالي په اړه د مجلس ګډونوالو ته معلومات ورکړل.
د ازموینو مرکزي کمېټې مشر پوهاند احمد ګل واثق د پوهنتون مشرتابه ته ډاډ ورکړ، چې د کمېټې د غړو په مرسته به په منظمه توګه د ازموینو د اخیستلو بهیر څارنه وکړي او د کمېټې د کړنلارې سره سم به ازموینې واخلي.
د یادونې وړ ده، چې د روان سمستر ازموینې به د لوړو زده کړو وزارت د پرېکړې سره سم د کب په ۷مه نېټه پیل او د یادې میاشتې تر پایه به دوام وکړي.
