د ننګرهار پوهنتون اداري، تقرر او انفکاک مجلسونه ترسره شول.
په یادو کاري ناستو کې، چې د لیندۍ په ۵مه نېټه د ننګرهار پوهنتون ریاست مقام کې ترسره شوې او ددې پوهنتون رئیس، مرستیالانو، د اړوندو پوهنځیو او تدریسي روغتون رئیسانو او ځینو اداري امرینو په کې برخه لرله، د پوهنتون د مالي، اداري، د استادانو تقرر او انفکاک کیسونو په اړه بحث او پرېکړې وشوې.
د ننګرهار پوهنتون رئيس د مجلس د پرانیستې پر مهال د سمستر د منځنیو ازموینو د بریالي ترسراوي له امله د پوهنځیو د مسؤلینو او استادانو مننه وکړه او په یاده برخه کې یې د هغوی هلې ځلې وستایلې.
نوموړي دغه راز اړوندو مسؤلینو ته لارښوونه وکړه، چې د څانګو او پوهنځیو ارزونې لپاره لازم چمتووالی ولري، چې په وینا یې، یاده پروسه به راتلونکې سه شنبه پیل شي.
د اداري او مالي چارو مرستیال پوهنیار قاضي خالد صداقت د تېر اداري مجلس د پرېکړو له مخې د ترسره شویو اجرااتو ګزارش وړاندې کړ.
د ننګرهار پوهنتون د علمي چارو مرستیال پوهندوی احسان الله ناصح، د تحقیقاتو او علمي مجلو مرستیال پوهنمل دوکتور کفایت الله کاکړ او د محصلانو چارو مرستیال پوهنیار حافظ سید محمدقاسم هاشمي د مجلس نور ویناوال وو، چې د حاضرۍ، تضمین کیفیت، علمي تحقیقاتو او ځینو نورو موضوعاتو په اړه یې مسؤلینو ته سپارښتنې وکړې، چې د هغوی له خوا د لازمو اجرااتو ډاډ ورکړل شو.
د ننګرهار، نورستان، کندز او الفلاح پوهنتونونو د تقرر او انفکاک ۹ کیسونه او نور متفرقه اداري او مالي مسایل هغه څه وو، چې د یادو مجلسونو پر مهال یې په اړه بحث او لازمې پرېکړې وشوې.
سرچینه: د اړیکو، نشراتو او عامه پوهاوي آمریت
