د ننګرهار وادي کرنیز شرکت رئیس د ننګرهار پوهنتون رئیس سره ولیدل.
د ننګرهار وادي کرنیز شرکت رئیس محمد بصیر حقیار د ننګرهار پوهنتون رئیس پوهاند دوکتور خلیل احمد بهسودوال سره ولیدل.
په نوموړې مشورتي ناسته کې، چې د پوهنتون د علمي چارو او محصلانو چارو مرستیالانو، د کرنې، اقتصاد او انجنیري پوهنځیو رئیسانو، د بهرنیو اړیکو کمېټې مشر او ځینو اداري آمرینو په کې برخه لرله، دواړو لورو د متقابلو اړیکو او همکاریو د رامنځته کېدو پر مواردو بحث او خبرې اترې وکړې.
د ننګرهار وادي کرنیز شرکت رئیس محمد بصیر حقیار وویل، چې اداره یې په پام کې لري، د ننګرهار په کانال کې بنیادي تغیرات رامنځته کړي او د یادې ملي پروژې د انکشاف تر څنګ په اړوندو برخو کې شته ستونزې له منځه ویسي، چې په دې برخه کې د ننګرهار پوهنتون مرستې، مشورو او ګډ کار ته اړتیا لرو.
ښاغلي حقیار د یادې موخې د ترلاسه کولو لپاره د پوهنتون د کرنې، وترنري علومو، اقتصاد، انجنیري او حقوقو پوهنځیو د علمي کادر غړو د یوه تخنیکي او حمایوي بورد د رامنځته کېدو د غوښتنې سربېره په خپله ساحه کې د محصلینو عملي زده کړو ته د زمینې برابرولو او همدارنګه د پوهنتون د استادانو او محصلینو لپاره د څېړنیزو فارمونو د جوړېدو ژمنه هم وکړه.
د ننګرهار پوهنتون رئيس پوهاند دوکتور خلیل احمد بهسودوال ښاغلي حقیار ته د مرستې ډاډ ورکړ او ژمنه یې وکړه، چې د پوهنتون علمي کادرونه به د ننګرهار وادي کرنیز شرکت سره د څېړنو، سروې ګانو، عملي چارو، تخنیکي مشورو، د پروژو څارنې او تعقیب او نورو برخو کې همکاري وکړي.
نوموړي دغه راز د پوهنتون د محصلینو او استادانو لپاره د تحقیقاتي فارمونو د جوړېدو او عملي زده کړو او څېړنو زمینې برابرولو په برخه کې د ننګرهار وادي کرنیز شرکت مشرتابه د مرستې مننه وکړه او زیاته یې کړه، چې ډېر ژر به یې په اړه عملي اقدامات ترسره کړي.
