د لوړو زده کړو سرپرست وزیر ننګرهار پوهنتون کې د ماسترۍ د درېو برنامو او ګڼو رغنیزو پروژو پرانیسته وکړه.

د لوړو زده کړو سرپرست وزیر شیخ الحدیث م/ولوي نداء محمد ندیم د لیندۍ په ۲۶مه نېټه ننګرهار پوهنتون ته د کاري سفر په ترڅ کې ددې پوهنتون کرنې پوهنځي کې د ماسترۍ د درېو نویو ایجاد شویو برنامو او د ۲۱.۵ میلیونه افغانیو په لګښت د بشپړو شویو ۲۱ پروژو پرانیسته وکړه.

د لوړو زده کړو سرپرست وزیر او ورسره مل پلاوي ددې پوهنتون د مشرتابه، علمي شورا غړو، د اړوندو پوهنځیو او تدریسي روغتون رئیسانو سره د پوهنتون ریاست مقام کې غونډه وکړه او د هغوی ستونزې او وړاندیزونه یې واورېدل.

د ننګرهار پوهنتون رئیس پوهاند بهسودوال د غونډې د پرانیستې وینا پر مهال د لوړو زده کړو سرپرست وزیر شیخ الحدیث م/ولوي نداء محمد ندیم او ورسره مل پلاوي راتګ ته ښه راغلاست ووایه او مننه یې ترې وکړه، چې د هېواد ټولو زونونو ته یې د تحصیلي وضعیت د ارزونې او بهبود په موخه سفرونه پیل کړي.

نوموړي د ننګرهار پوهنتون د علمي او تدریسي وضعیت، کړنو، لاسته راوړنو او ستونزو په اړه راغلي پلاوي ته معلومات ورکړل او د ستونزو د حل په برخه کې یې د همکارۍ غوښتنه وکړه.

د لوړو زده کړو سرپرست وزیر شیخ الحدیث م/ولوي نداء محمد ندیم ننګرهار پوهنتون د هېواد له سترو او تاریخي پوهنتونونو یاد کړ، چې د تحصیلي ډګر د پیاوړتیا لپاره یې ډېر کار کړی او لا هم پر دې ډګر چټک ګامونه اخلي.

نوموړي د ننګرهار پوهنتون لپاره د غونډو د یوه معیاري هال جوړولو، نیمه کاره ودانیو د چارو بشپړولو، ځمکو استملاک او ځینو نورو برخو کې د همکارۍ ژمنه وکړه.

د لوړو زده کړو سرپرست وزیر ددې پوهنتون کرنې پوهنځي کې د ماسترۍ په نویو ایجاد شویو برنامو خوښي وښوده او د پوهنتون مشرتابه ته یې لارښوونه وکړه، چې د ماسترۍ او دکتورا نور پروګرامونه دې هم ایجاد کړي.

د لوړو زده کړو سرپرست وزیر شیخ الحدیث م/ولوي نداء محمد ندیم د ولایتي ادارې او پوهنتون د مسؤلینو په ملتیا د ترسره شویو رغنیزو چارو نه لیدنه وکړه او په دې پوهنتون کې د رامنځته شویو مثبتو تغیراتو ستاینه یې وکړه.

نوموړي همدا راز د محصلینو له هغې نندارتون هم لیدنه وکړه، چې د هغوی له خوا جوړ شوي موډلونه او اختراعات په کې نندارې ته اېښودل شوي وو.

سرچینه: د اړیکو، نشراتو او عامه پوهاوي آمریت