د ریلیف انټرنیشنل ادارې مسؤلینو د ننګرهار پوهنتون رئيس سره وليدل.
د ریلیف انټرنیشنل ادارې د ویټ پروژې مشر شاکرالله سعید او ورسره مل پلاوي د ننګرهار پوهنتون رئيس پوهاند دوکتور خلیل احمد بهسودوال سره ولیدل.
د لیدنې پر مهال ښاغلي سعید د خپلو روزنیزو پروګرامونو په اړه د پوهنتون مشرتابه ته معلومات ورکړل او زیاته کړه، چې اداره یې په پام کې لري، د ننګرهار پوهنتون محصلینو ته د ښځو د حقونو او پر وړاندې یې د تاوتریخوالي د مخنیوي په اړه روزنیز کورسونه او ورکشاپونه دایر کړي.
د ننګرهار پوهنتون رئيس پوهاند دوکتور خلیل احمد بهسودوال د ریلیف انټرنیشنل ادارې مسؤلینو مننه وکړه، چې د ښځو د حقونو په برخه کې مبارزه کوي او په یاده برخه کې یې راغلي پلاوي ته د مرستې او همکارۍ ډاډ ورکړ.
