کرنې پوهنځی

لنډه پېژندنه

کرنې پوهنځی د ننګرهار پوهنتون په تشکيلاتي چوکاټ کې په ۱۳۵۷ کال کې تأسيس شو. په لومړيو کې یې درې ديپارتمنتونه (اګرانومي، حيواني علوم او کرنيز اقتصاد او توسعه) لرل، چې اوس مهال د شپږو ديپارتمنتونو لرونکی دی، چې د پخوانيو دريو ديپارتمنتونو تر څنګ د هارتيکلچر، د نباتاتو ساتنې او کرنيز تجارت يا کاروبار مديريت ديپارتمنتونو څخه عبارت دي. کرنې پوهنځی ۸۹۷ تنه محصلین لري، چې د تدریس چارې د ۳۵ تنو استادانو له خوا پر مخ وړل کېږي او تر دې دمه یې په ۴۱ دورو کې ۴۶۵۳ تنه فارغان د ليسانس په کچه ټولنې ته د خدمت لپاره وړاندې کړي دي.

د پوهنځي اصلي موخه د کرنې په چارو کې د کادرونو روزنه ده، تر څو وکولای شي، د کرنې سکتور ته په علمي او مسلکي توګه پرمختګ ورکړي، چې له امله یې د غذايي خونديتوب د تامينولو لپاره لاره هواره، ټولنيز او اقتصادي پرمختګونه رامنځته او د خلکو د ژوند کچه د کیفي پلوه اصلاح او لوړه شي.

د کرنې سکتور د کادرونو د رزونې موخه د بشري وړتياوو لوړول تر څو په اړونده برخو کې څېړنې، ليکنې ترسره، تکنالوژي معرفي او خپرېدو کې مرسته چې د غذايي موادو او لومړنېو اړتياوو د پوره کولو ترڅنګ د چاپيريال ساتنه ترسره او هم د پايدارې کرنې ستراتيژي پلي شي، چې راتلونکي نسلونه د اوسنیو طبيعي سرچينو څخه هم د استفادي حق ترلاسه کړي.

کرنې پوهنځی د زده کړيالانو د وړتياوو لوړولو لپاره لابراتوارونه، حېواني او نباتي فارمونه، کتابتون او انټرنت خونې لري. استادان یې د تدريس تر څنګ د څېړنو په برخه کې لوی لاس لري او د څېړنو لړۍ په کې پیل شوې ده. یاد پوهنځی د کورنيو پوهنتونونو د کرنې پوهنځيو، د نړيوالو پوهنتونونو، تخنيکي او علمي سازمانونو، دولتي سکتوري ادارو، غیر دولتي مؤسسو سره اړيکي لري.

لرليد

د کرنې په چارو کې د علمي کادرونو د روزنې له لارې د کرنيز سکتور د عصري کولو او د پرمختيا له برکته د وګړو په ټولنيز او اقتصادي ژوند کې مثبت بدلون او اصلاحات راوستل دي.

ماموريت

د کرنې په چارو کې د علمي کادرونو د روزلو، د څېړنو، ليکنو، د عصري او د مناسبې تکنالوژي د معرفي او خپرونو له لارې کرنيز سکتور هر اړخيز پرمختيا له کبله د وګړو په ټولنيز او اقتصادي ژوند په برخو کې د کرنيزو حاصلاتو د کچې لوړونه، مناسب پروسس، زېرمه کول، بازار موندنه (ځنځيري ارزښت لوړونې) او د طبيعي تعادل ساتنې او پايښت له مخې مثبت بدلون راوستل دي.

موخې

د کرنې پوهنځي اداره ستراتېژیک پلان جوړونې څخه موخه د لوړو زده کړو د بهیر چټکتیا او ښه والی دی تر څو په ټولنه کې د شته ناورینونو او ستونزو پای ته رسېدو په برخه کې خپله ونډه واخلي. پوهنځی د ټاکلو ارزښتونو، لیدلوري او معیارونو په پام کې نیولو سره داسې وړ، مسلکي او معیاري کادرونه روزي چې د ټولنې په پرمختګ او د ستونزو په حل کې د خدمت وړاندې کولو جوګه شي. پوهنځی پورته ارزښتونو او لیدلوري ته د رسېدو په موخه په راتلونکو پنځو کلونو کې لاندې اهداف تعقیبوي:

د علمي او څېړنیزو چارو په برخه کې په ملي او نړیوالو معیارونو برابر چاپيريال رامنځته کول
د لوړو زده کړو په برخه کې غوره خدمتونو وړاندې کولو په پار د هر اړخیزې خپلواکۍ ترلاسه کول
د لوړو زده کړو په برخه کې د روڼ او شفاف بهیر رامنځته کول
د څېړنو پر مټ د ټولنې ستونزو پېژندل او ورته مناسبې حل لپارې پیدا کول
د لوړو زده کړو وزارت، ولايت، ډونرانو، پراختيايي ښکېلو خواوو او نورو تمویلوونکو ادارو او اشخاصو په وړاندې د ننګرهار پوهنتون او کرنې پوهنځي څخه اغېزمنه استازولي او له دوی سره د ښو اړيکو ټينګول
د وخت او اړتیاووله غوښتنو سره سم په بېلابېلو برخو کې د مسلکي اشخاصو روزل
د لوړو زده کړو له لارې د قانون حاکمیت، عدالت تامین، اقتصادي ودې او امنیت تامینولو ته زمینه برابرول