د ننګرهار پوهنتون محصلینو ته (د قرآن کریم اعجاز، تلپاتې عظمت او پیغام) تر سرلیک لاندې دیني او علمي سیمینار وړاندې شو.
یاد سیمینار د ننګرهار پوهنتون عمومي رئیس دوکتور مفتي عبدالوارث بسام له خوا تېره ورځ د ماښام لمانځه څخه وروسته د پوهنتون په جامع مسجد کې سلګونو تنو لیلیه محصلینو ته ارایه شو.
د سيمینار پر مهال د قرآن کریم پر مقام او منزلت، د هغه پر اعجاز، د نزول پر حکمت، د انسان په فکري، اخلاقي او معنوي روزنه کې يې پر نقش او د فردي او ټولنیز ژوند سمون لپاره د قرآن کريم پر لارښوونو خبرې وشوې.
د پوهنتون محترم رئیس د قرآن کریم زده کړې او تلاوت تر څنګ د معناوو پر درک، تدبر او په ورځني ژوند کې د قرآني لارښوونو پر عملي کولو ټینګار وکړ او زیاته یې کړه، چې قرآن کریم د انسانانو لپاره د هدایت، عدالت، اخلاقو، علم او حکمت ابدي سرچینه ده.
په سيمینار کې همدارنګه د ځوان نسل په سالمه روزنه، د معاصرې نړۍ د فکري او اخلاقي ننګونو پر وړاندې د قرآني لارښوونو پر اهمیت او د اسلامي احکامو په ترویج او ساتنه کې د محصلینو پر مسؤلیتونو بحث وشو.
د سیمینار په پای کې محصلینو ته سپارښتنه وشوه، چې له قرآن کریم سره خپله اړیکه پیاوړې کړي، د هغه په معناوو، تفسیر او پیغامونو په کامله توګه ځانونه پوه کړي، تر نورو یې ورسوي او د قرآني لارښوونو په رڼا کې ژوند تېر کړي.
د یادونې وړ ده، چې دغه سيمینار د ننګرهار پوهنتون د دعوت او ارشاد امریت له لوري محصلینو ته د اصلاحي غونډو په سلسله کې دایر شو، چې د دعوت او ارشاد آمر مولوي اعجازالحق زَلِف هم په کې حضور درلود.
سرچینه: د نشراتو او عامه اړیکو امریت
