د لوړو زده کړو وزارت د محصلانو خدمتونو او همغږۍ رئیس د ختیځ زون د امارتي پوهنتونونو له مسؤلینو سره د همغږۍ غونډه وکړه.
ننګرهار پوهنتون کې د لوړو زده کړو وزارت د محصلانو خدمتونو او همغږۍ رئیس مولوي فضل کریم صدیقي د ختیځ زون د امارتي پوهنتونونو د محصلانو چارو له مرستیالانو، د محصلانو خدمتونو او همغږۍ آمرینو، د دعوت او ارشاد له آمرینو او مبلغینو سره د همغږۍ او د چارو د لا ښه والي په موخه غونډه وکړه.
د غونډې د پرانیستې وینا پر مهال د ننګرهار پوهنتون عمومي رئیس شیخ انعام الله مدني ګډونوالو ته ښه راغلاست ووایه او ویې ویل، چې د دواړو ریاستونو او شعباتو ترمنځ همغږي، همکاري او د تجربو شریکول د محصلینو او استادانو ستونزو په حل، فکري روزنه او پوهنتون کې د اسلامي او اخلاقي ارزښتونو په ساتلو کې اساسي رول لري.
نوموړي د کارونو ښه والي، تعقیب او همغږۍ په موخه دغه ډول غونډې جوړېدل مهمې وبللې او مسؤلینو ته یې په کارونو کې د اخلاص تر څنګ په سمه توګه د مسؤلیت ترسره کولو سپارښتنه وکړه.
د لوړو زده کړو وزارت د محصلانو خدمتونو او همغږۍ رئیس مولوي فضل کریم صدیقي په خپلو خبرو کې د جوړې شوې جلسې د اهدافو په هکله معلومات وړاندې کړل او د دعوت او ارشاد او محصلانو خدمتونو همغږۍ ریاستونو د کارونو په اهمیت یې وینا وکړه.
نوموړي وویل، د غونډې پر مهال به مسؤلینو ته بېلابېلو برخو کې لارښوونې او سپارښتنې وشي او هم به د هغوی وړاندیزونه واورېدل شي.
د اجنډا له مخې په دې غونډه کې د محصلانو خدمتونو او همغږۍ او دعوت او ارشاد امریتونو تر منځ ګډې همکارۍ، موجوده ستونزو حلولو، د چارو مؤثریت لپاره وزارت سره د وړاندیزونو شریکولو، د کارونو لا ښه تنظیم او دقت، د کاري لوایحو او وزارت له لوري لېږل شويو لارښودونو او هوکړه لیکونو ښه تطبیق، د محصلانو څخه اخیستل کېدونکو رقابتي سیالیو کې ټاکل شويو قواعدو مراعتولو او نوښتګرو محصلینو ته د امکاناتو او وسایلو برابرولو په هکله بحثونه او پرېکړې وشوې.
سرچینه: د اطلاعاتو، نشراتو او عامه اړیکو امریت
