ننګرهار پوهنتون کې د ختیز زون د دولتي پوهنتونونو د اسلامي ثقافت د ۷۹ کادري بستونو لپاره له ۳۷۶ تنو کاندیدانو د عربي ژبې ازموینه واخیستل شوه.
یاده ازموینه د تلې په ۱۳مه نېټه د ژبو او ادبیاتو پوهنځي د عربي څانګې له خوا په داسې حال کې واخیستل شوه، چې د پوهنتون د مشرتابه، مرستیالانو او د ادبیاتو پوهنځي د مسؤلینو او استادانو سربېره د لوړو زده کړو وزارت علمي او اداري معینانو هم حضور درلود.
د ننګرهار پوهنتون رئیس پوهاند دوکتور خلیل احمد بهسودوال د ازموینې ګډونوالو ته ډاډ ورکړ، چې د لوړو زده کړو وزارت د مشرتابه پلاوي د مستقیم نظارت او لارښوونو په رڼا کې یې د عربي څانګې د استاذانو او ټاکل شوي ممتحنه هیئت سره په ګډه د ازموينې د روڼتیا او شفافیت په برخه کې تر ممکنه حده هلې ځلې کړي دي.
نوموړي د ازموینې پروسې په اړه کاندیدانو ته معلومات ورکړل او زیاته یې کړه، چې ازموینه به په تمامه معنی شفافه واخلي او د عدالت له مخې به حق حقدار ته وسپاري.
د لوړو زده کړو وزارت علمي معین دوکتور لطف الله خیرخواه، د اداري او مالي چارو معین مولوي محمد حامد حسیب، د ننګرهار پوهنتون رئیس پوهاند دوکتور خلیل احمد بهسودوال، د لوړو زده کړو وزارت فوق العاده استازي او د اداري او مالي چارو مرستیال پوهنیار قاضي خالد صداقت، د علمي چارو مرستیال پوهندوی احسان الله ناصح او د محصلانو چارو مرستیال سید محمد قاسم هاشمي د ازموینې بهیر څخه لیدنه وکړه او د لیدنې پر مهال یې استادانو ته سپارښتنه وکړه، چې ګډونوالو کاندیدانو ته په ښه توګه لارښوونه وکړي او ازموينه دې د علمي نورمونو او اصولو سره سمه واخلي، چې د هغوی له خوا د اجرااتو ډاډ ورکړل شو.
