ننګرهار پوهنتون کې د واليبال سيالۍ د انجنیري پوهنځي په بریا پای ته ورسېدې.
یادې سیالۍ د ننګرهار پوهنتون د واليبال منتخبې لوبډلې د غوراوي په موخه د سپورت او بدني روزنې آمريت له خوا د دې پوهنتون د اړوندو پوهنځیو د لوبډلو تر منځ دوه اوونۍ وړاندې پیل شوې وې.
د ننګرهار پوهنتون د سپورت او بدني روزنې آمر محمد نسیم کاکړ په وینا، د سیالیو پایلوبې ته د انجنیري او اقتصاد پوهنځیو لوبډلو لار پیدا کړه، چې د انجنیري پوهنځي لوبډلې وکولای شو، چې ۳ د ۱ پر وړاندې نمرو سره د یادو سیالیو اتلولي په خپل نوم کړي او په دې توګه انجنیري پوهنځي لوبډلې لومړی او د اقتصاد پوهنځي لوبډلې دویم مقام خپل کړ.
د ټورنمنټ د پای په مراسمو کې د ننګرهار پوهنتون د محصلانو چارو مرستيال پوهنوال سید اکرم هاشمي په ګډون د یادو پوهنځیو مسؤلینو او استادانو برخه لرله، چې د سیالیو ګټونکي لوبډلې او غوره لوبغاړو ته یې کپونه، مډالونه او نورې ډالۍ ورکړې.
