د ننګرهار پوهنتون د تقرر او انفکاک غونډه ددې پوهنتون د رئيس پوهاند دوکتور خليل احمد بهسودوال په مشرۍ ترسره شوه.
په یاد مجلس کې د محصلانو چارو مرستيال پوهنوال سيد اکرم هاشمي، د پوهنځيو او تدریسي روغتون رئيسانو او مرستیالانو برخه لرله، چې د علمي کادرونو د تقرر او نورو مسايلو په اړه په کې بحث او خبرې اترې وشوې.
د مجلس د پرانيستې وينا پر مهال د ننګرهار پوهنتون رئيس پوهاند دوکتور خليل احمد بهسودوال د پوهنتون د تدریسي بهیر د پیل کېدو لپاره د اړین چمتووالي په اړه د پوهنځیو مسؤلینو ته اړینې لارښوونې وکړې او هغوی یې خپلو مسؤلیتونو ته ځیر کړل.
نوموړي دغه راز د پوهنځیو او تدریسي روغتون رئیسانو ته سپارښتنه وکړه، چې د روانې کب میاشتې تر ۲۵ نېټې دې د ۱۳۹۹ لمریز کال د کړنو او لاسته راوړنو ګزارشونه برابر او د پوهنتون ادارې ته وسپاري.
د غونډې په دویمه برخه کې د ننګرهار، لغمان، کونړ سید جمال الدین افغاني، نورستان، لوګر او کندز پوهنتونونو او لوړو زده کړو موسسو د تقرر ۱۵ کیسونه مطرح او د بحث او پرېکړو وروسته اړوندو څانګو ته محول شول.
