د ننګرهار پوهنتون بشپړ اکاډميک اعتبار اخیستل د يوې سترې غونډې په ترڅ کې ونمانځل شو
د هېواد په کچه د لوړو زده کړو د تضمين کيفيت او اعتبار ورکولو پروسې په درېيم پړاو کې په لوړو نومرو د ننګرهار پوهنتون بريا او بشپړ اکاډميک اعتبار اخیستل د لیندۍ په ۲۹مه د يوې سترې غونډې په ترڅ کې ددې پوهنتون په انګړ کې ونمانځل شو.
په همدې اړه جوړو شویو مراسمو کې د ننګرهار پوهنتون د رهبرۍ، استادانو، محصلانو او اداري کارکوونکو سربېره د ولسمشر ستر سلاکار او د ننګرهار والي، د ولایت مقام اداري او مالي مرستیال، د ولایتي ادارې رئیسانو، د یو شمېر دولتي او خصوصي پوهنتونونو رئیسانو، علماوو، قومي مشرانو، مدني فعالانو او د رسنیو استازو برخه لرله.
د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال د غونډې برخوالو ته د ښه راغلاست تر څنګ د پوهنتون د یادې سترې بریا او لاسته راوړنې مبارکي وویله او د تضمین کیفیت پروسې په درېو پړاوونو کې یې د ننګرهار پوهنتون په علمي مزل رڼا واچوله.
نوموړي د اکاډمیک اعتبار اخیستل د پوهنتون د ټولو منسوبینو، له رهبرۍ او استادانو نیولې د اداري او خدماتي کارکوونکو پورې د ټولو ښاغلو او آغلو د هلو ځلو او زحمتونو پایله وګڼله، چې ننګرهار پوهنتون په لوړو (۸۹.۵) نمرو بشپړ اکاډمیک اعتبار ترلاسه کړ او زیاته یې کړه، چې د یاد سند نه په ګټې اخیستنې په پوهنتون کې نوي پوهنځي، دیپارتمنتونه، د فوق لیسانس نورې برنامې رامنځته کړي او یو شمېر پوهنځي به پوهنتونونو ته لوړ کړي.
د ولسمشر سلاکار او د ننګرهار والي ضياءالحق امرخېل د ننګرهار پوهنتون له مسئولينو څخه مننه وکړه، چې په هڅو يې د لوړو زده کړو تضمين کيفيت او اعتبار ورکولو پروسې په درېيم پړاو کې لوړې نمرې ترلاسه کړې او د همدې بريا له امله يې ټولو ته مبارکي ورکړه.
نوموړي زياته کړه، چې د ننګرهار پوهنتون تر ډېرو لوړو ژورو ګاللو وروسته ياد معيار ترلاسه کړی او د پوهنتون مسئولينو څخه يې وغوښتل، چې د دې بريا ساتلو ترڅنګ د سيمې او نړۍ په کچه د اعتبار تر لاسه کولو په موخه هڅې وکړي.
ده همدا راز ډاډ ورکړ، چې ولايتي اداره به د پوهنتون د ځمکو غصب څخه د خلاصون، انکشافي پروګرامونو تطبيق او نورو برخو ته په ټول توان سره پاملرنه وکړي.
د ننګرهار مالي او اداري مرستيال پوهنوال ببرک مياخېل د جمهور رئيس محمد اشرف غني، د ننګرهار پوهنتون د علمي چارو مرستيال پوهندوی دوکتور محمد حامد کډوال د لوړو زده کړو وزارت د علمي معین پوهنمل عبدالتواب بالاکرزي، د محصلانو چارو مرستيال پوهندوی سيد اکرم هاشمي د مشرانو جرګې رئيس فضل هادي مسلميار پيغامونه ولوستل، چې په کې د مبارکۍ ترڅنګ دې پوهنتون سره د هر ډول همکارۍ ډاډ ورکړل شوی و.
په ولسي جرګه کې د ننګرهار د خلکو استازي عبدالرؤف شپون او نبي االله باز، د ولايتي شورا غړی ډاکتر ناصر کاموال، دیني عالم مولوي عزیز الرحمن او د ننګرهار پوهنتون د فارغانو ټولنې مرستیال ډاکتر حسیب الله تره کی د غونډې نور ویناوال وو، چې ټولو د پوهنتون د یادې لاسته راوړنې ستاينه وکړه او په خپله برخه کې يې د همکارۍ ډاډ ورکړ.
د غونډې په دویمه برخه کې د ننګرهار پوهنتون د ژورنالېزم او عامه اړیکو پوهنځي له خوا جوړ شوی د پوهنتون مستند نندارې ته وړاندې شو او په وروستۍ برخه کې د پوهنتون یو شمېر مسؤلین او استادان د ننګرهار والي او د پوهنتون ادارې له لوري د ښو کړنو له امله په درېمه درجه تقديرنامو، ستاینلیکونو او مډالونو وویاړل شول.
