د ننګرهار پوهنتون او روټري کلب ادارې تر منځ د ګډو همکاريو تفاهمليک لاسليک شو
د مسؤلينو په وينا، د ياد تفاهمليک له مخې به د راتلونکو درېو کلونو لپاره دواړه ادارې د انګليسي ژبې زده کړې او معلوماتي ټکنالوژۍ په برخه کې د محصلينو روزنې ته دوام ورکوي.
ياد تفاهمليک د ننګرهار پوهنتون رئيس پوهاند دوکتور خلیل احمد بهسودوال او په ننګرهار کې د روټري کلب ادارې مسؤل انجنیر عبدالقیوم الماس له خوا په داسې حال کې، چې د ښوونې او روزنې پوهنځي رئيس پوهنوال کریم الله بیدار او د پوهنتون د بهرنیو اړیکو کمېټې مشر پوهنیار ډاکتر محمد دوست صافي هم حضور درلود، لاسليک شو.
د هوکړه ليک د موادو له مخې به ننګرهار پوهنتون او د لاهويه ګلډن ټراينګل روټري کلب بنسټ په ګډه د راتلونکو درېو کلونو لپاره د ننګرهار پوهنتون استادانو او محصلانو ته د انګليسي ژبې او معلوماتي ټکنالوژۍ زده کړې کورسونه جوړوي او دغه راز به په يو شمېر نورو علمي او رغنيزو برخو کې له ننګرهار پوهنتون سره مرسته او همکاري کوي.
