د ننګرهار والي شاه محمود میاخېل د کړنو او خدمتونو ستاینه وشوه
د جلال اباد په شاهي ماڼۍ کې د یوې سترې ولسي غونډې په ترڅ کې د ننګرهار د ملکي او نظامي ادارو مسؤلینو او ددې ولایت قومي مشرانو او مخورو د امنيت، اقتصادي پرمختګ، سياست، کلتوري او فرهنګي تغير او يو شمېر نورو برخو کې د ښاغلي میاخېل د تر سره کړيو خدمتونو او هلو ځلو ستاینه او قدردانی وکړ او نوموړی یې د اعزاز پګړیو په سرولو، ایوارډونو او ستاینلیکونو په ورکړې سره وستایه.
د ننګرهار پوهنتون په استازیتوب د محصلانو چارو مرستیال پوهندوی سید اکرم هاشمي د یو شمېر استادانو او محصلانو په ملتیا ښاغلي میاخېل ته ستاینلیک ورکړ او د ننګرهار پوهنتون په علمي او رغنیز پرمختګ کې یې د نوموړي د ترسره کړیو هلو ځلو او خدمتونو یادونه وکړه.
نوموړي ښاغلی میاخېل علمي او فرهنګي شخصیت یاد کړ، چې په وینا یې، له پوهنتون سره یې د خپل ماموریت پر مهال نږدې اړیکې لرلې او وخت په وخت به یې ددې علمي کانون په غونډو، مجلسونو او نورو پروګرامونو کې برخه اخیستله.
