د ختیځ زون امارتي او خصوصي پوهنتونونو او لوړو زده کړو مؤسسو ته د اعتبار ساتنې په موخه د کیفیت لوړاوي او اعتبار ورکولو پروسې د معیارونو د تشریح ۳ ورځنی سيمینار پیل شو.
یاد سيمینار د لوړو زده کړو وزارت د کیفیت لوړاوي او اعتبار ورکولو ریاست له لوري د ننګرهار پوهنتون په (PDC) مرکز او د ساینس پوهنځي د غونډو په تالار کې د ننګرهار پوهنتون په ګډون د ختیځ زون امارتي او خصوصي لوړو زده کړو مؤسسو رهبرۍ غړو، پوهنځیو رئیسانو، ډیپارټمنټونو مشرانو، مستقلو او غیرې مستقلو امریتونو مسؤلینو ته دایر شو.
د یاد سيمینار پر مهال به د بېلابېلو علمي مراکزو استازو ته د کیفیت لوړاوي او اعتبار ورکولو اصلي او فرعي معیارونه په تفصیلي شکل تشریح او تفسیر شي، چې په پایله کې به یې د تحصیلي او امارتي نهادونو د زده کړو او اکاډمیکو فعالیتونو کیفیت لوړ شي او د اخیستي اعتبار څخه به ساتنه وکړي.
د سيمینار د پرانیستې وینا پر مهال د ننګرهار پوهنتون رئیس شیخ انعام الله مدني د کیفیت لوړاوي او اعتبار ورکولو په ارزښت او اهمیت خبرې وکړې او د تحصیلي نظام پیاوړتیا او ټولنې ته د معیاري تحصیلي خدمتونو وړاندې کولو په برخه کې یې د خصوصي او امارتي پوهنتونونو په ګډ کار او یووالي ټینګار وکړ.
نوموړي په یاد سيمینار کې د فعال ګډون او علمي نهادونو کې د معیارونو سم تطبیق سپارښتنه وکړه.
د ننګرهار پوهنتون د علمي چارو مرستیال پوهندوی مولوي احسان الله ناصح په خپلو خبرو کې د لوړو زده کړو وزارت د کیفیت لوړاوي او اعتبار ورکولو ریاست له مسؤلینو د یاد سيمینار د جوړېدو له کبله مننه وکړه او د هېواد د تحصیلي بنسټونو د چارو په پیاوړتیا کې یې د هغوی هلې ځلې وستایلې.
د ننګرهار پوهنتون استاد پوهنوال رضوان الله ممله وال، د کابل پولي تخنیک پوهنتون استاد پوهنمل محمد امین امین، د شیخ زاید پوهنتون استاد پوهنمل دوکتور قدرت الله ځواک او د پکتیا پوهنتون استاد پوهنمل محمد امین احمدزی ددې سيمینار د روزنې چارې پرمخ وړي، چې د محتوا مسایلو تشریح ترڅنګ به د یادو پوهنتونونو او لوړو زده کړو مؤسسو د خدماتو کیفیت لوړاوي په لارو چارو خبرې وکړي، د ګډونوالو پوښتنې به ځواب کړي او د اعتبار ورکولو پروسې اسانتیاوې او عملي تجربې به له ګډونوالو سره شریکې کړي.
