د ننګرهار پوهنتون ۵ بستونو لپاره له ۴۰ تنو کاندیدانو څخه ازموینه واخیستل شوه.
یاده ازموینه د تدریسي روغتون نويو زېږېدلو کوچنیانو او نسایي ولادي څانګو او د ننګرهار پوهنتون د ژبو او ادبیاتو پوهنځي تحویلدارۍ بستونو لپاره واخیستل شوه.
ددې بستونو ازموینه د ننګرهار پوهنتون او ننګرهار ولایت د اداري اصلاحاتو او ملکي خدمتونو ګډ پلاوي په حضور کې د ټاکل شوي ممتحنه هیئت له خوا واخیستل شوه.
د ننګرهار پوهنتون رئیس شیخ انعام الله مدني، د علمي چارو مرستیال پوهندوی مولوي احسان الله ناصح، د اداري او مالي چارو مرستیال پوهنیار قاضي خالد صداقت، د محصلانو چارو مرستیال پوهنیار حافظ سید محمد قاسم هاشمي، د ننګرهار د اداري اصلاحاتو او ملکي خدمتونو رئیس مولوي مطیع الله طلحه او ددې ریاست کارپوه عبدالله قاري بابا د ازموینې اخیستلو له بهیر څخه لیدنه او څارنه وکړه.
نوموړو په خپلو خبرو کې ګډونوالو کاندیدانو ته ډاډ ورکړ، چې د ازموينې د روڼتیا او شفافیت په برخه کې یې تر ممکنه حده هلې ځلې کړي او د عدالت له مخې به حق حقدار ته وسپاري.
