ننګرهار پوهنتون کې د فوټبال سیالۍ پیل شوې.
د فوټبال سياليو یاد ټورنمنټ، چې دوه اوونۍ به دوام وکړي، د کب په ۶مه نېټه د ننګرهار پوهنتون د بدني روزنې آمريت له خوا ددې پوهنتون د اړوندو پوهنځيو د لوبډلو ترمنځ پیل شو.
د ټورنمنټ د پرانیستې پر مهال د ننګرهار پوهنتون د محصلانو چارو مرستيال حافظ سید محمد قاسم هاشمي د سپورت په ارزښت او ګټو خبرې وکړې او سپورتي فعالیتونه یې د محصلینو په فزيکي او ذهني وده کې اغېزمن وبلل.
نوموړي ددغه ډول سياليو پر دوام د ټينګار او ملاتړ څرګندولو تر څنګ محصلین د سپورتي اصولو او اخلاقو رعایتولو ته راوبلل.
د پوهنتون د بدني روزنې آمر محمد نسیم کاکړ د پیل شویو سیالیو په اړه وویل، چې له دې سیالیو یې موخه محصلینو او ځوانانو ته د سالمې بوختیا رامنځته کول او دغه راز د نوي تحصیلي کال لپاره د پوهنتون د فوټبال د منتخبې لوبډلې ټاکل دي.
