ننګرهار پوهنتون سره د ۲۵۰ مېوه لرونکو او زینتي بوټو مرسته وشوه.
د نيالګيو ياده مرسته، چې ۱۰۰ د زیتونو، ۵۰ د لوکاټو او ۱۰۰ زینتي بوټي په کې شامل وو، د روښان لوړو زده کړو موسسې د ادارې له خوا شوې وه، چې د یادې موسسې د رئیس ښاغلي فاتح ګل شینواري او د علمي چارو مرستیال توریالي همت له خوا د ننګرهار پوهنتون مشرتابه ته وسپارل شوه.
د ننګرهار پوهنتون رئیس پوهاند دوکتور خلیل احمد بهسودوال او د اداري او مالي چارو مرستیال پوهنیار قاضي خالد صداقت د روښان لوړو زده کړو موسسې د مشرتابه مننه وکړه، چې د ننګرهار پوهنتون په سمسورتیا او سرسبزۍ کې یې برخه واخیسته.
نوموړو د نیالګیو مرسته او کر جاریه صدقه وبلله او ټولو هغو ښاغلو ته یې، چې په دې برخه کې هلې ځلې کوي، د الله تعالی له درباره د اجر غوښتنه وکړه.
د مجلس په پای کې مرسته شوي نیالګي د دواړو پوهنتونونو د مسؤلینو، استادانو او محصلینو له خوا په ټاکل شویو ځایونو کې وکرل شول.
